Хотын дарга Д.Сумъяабазар НҮБ-ын Олон улсын шилжилт хөдөлгөөний байгууллагын Монгол Улс дахь салбарын Хөтөлбөрийн менежер Виктор Лутенког өнөөдөр хүлээн авч уулзлаа.
Олон улсын шилжилт хөдөлгөөний байгууллага нь НҮБ-ын төрөлжсөн, олон улсын мэргэжлийн байгууллага бөгөөд Монгол Улс дахь салбараараа дамжуулан дотоодын шилжилт хөдөлгөөний талаар цаг үеийн бодит, олон талт мэдээлэл бий болгох ажлуудыг хийсээр ирсэн билээ.
Энэ дагуу Швейцарын хөгжлийн агентлагийн санхүүжилтээр 2019-2023 онд дотоодын шилжилт хөдөлгөөнийг ойлгож, зохистой удирдахад Монгол Улсын Засгийн газарт дэмжлэг үзүүлэх төсөл хэрэгжүүлж байна.
Уулзалтаар талууд нийслэл рүү чиглэсэн шилжилт хөдөлгөөнийг хянах, үүнийг зохистой зохион байгуулах, олон улсад хүлээн зөвшөөрсөн Олон улсын шилжилт хөдөлгөөний байгууллагын шилжин суурьшилтын нөхцөл байдлын үнэлгээ буюу ДТМ арга хэрэгслийг нийслэлд илүү өргөн хүрээнд нэвтрүүлэх, энэ чиглэлд нийслэлийн холбогдох албан хаагчдын чадавхыг бэхжүүлэхэд хамтран ажиллах тухай санал солилцов.
Хотын дарга нийслэлд тулгамдаад буй томоохон асуудлууд болох замын түгжрэл, агаарын бохирдол зэргийг бууруулахад шилжилт хөдөлгөөнийг зүй зохистой удирдаж, иргэдийг үнэн, зөв мэдээллээр хангах нь зүйтэй болохыг дурдаж, Олон улсын шилжилт хөдөлгөөний байгууллагын үйл ажиллагааг дэмжиж ажиллахаа илэрхийллээ.
