Өчигдөр өдрийн /пүрэв гариг/ УИХ-ын цахим чуулган олон нийтэд төдийлөн танил болоогүй байсан зарим нэг гишүүдийг авир, ааштай нь таниулсан “чухал” чуулган болов. Тухайлбал, УИХ-ын гишүүн Г.Дамдинням Түр хорооны хуралдаанаас хоцорсондоо бухимдаж, үүндээ гудамжинд эргүүлийн үүрэг гүйцэтгэж байсан цагдаагийн албан хаагчийг буруутгасан, харьцаа хандлагад нь хяналт тавихыг Хууль зүйн сайд Х.Нямбаатарт сануулсан явдал нь эргээд иргэдийн бухимдлыг төрүүлэв.

Мань хүн цагдаагийн албан хаагчдыг өөрийг нь таньсангүй хэмээн бухимдаж, “Би ард түмнийхээ төлөө ажиллаж байна. Намайг цагдаа таньсангүй, 30 минут саатууллаа” гэсэн нь бүтэн арав шахуу хоног цагдаатайгаа үзэж тарж байгаа жирийн иргэдэд тийм ч таашаалтай сонсогдсонгүй. Уулзвар болгонд саатуулагдаж байцаагдсаар бүтэн өдрийг үрж байгаа тэдэнд “УИХ-ын гишүүнийг таних, танихгүй” асуудал биш нь тодорхой. Гэтэл үүн дээр Хууль зүйн сайд Х.Нямбаатар гишүүн Г.Дамдиннямаас ч дор үлгэрийг албан хаагч нартаа үзүүлэв.

Хэдэн жилийн өмнө Хууль зүйн сайд Х.Тэмүүжин дугаарын хязгаарлалттай өдөр хувийнхаа машинаар хөдөлгөөнд оролцож байгаад цагдаад саатуулагдаж, жолооны үнэмлэх, машины гэрчилгээгээ “журамлуулсан” байдаг юм. Сайдыгаа танилгүй журамласан цагдаа хэсэг дээрээ очоод хамт ажиллагсдаасаа энэ тухай мэдчихээд яаруу сандруу яаман дээр гүйж хүрээд уучлал гуйхад нь “Уучлал гуйх шаардлагагүй. Ажлаа шударгаар хийсэнд баярлалаа” хэмээн талархал илэрхийлж, зургаа хамт даруулаад буцаасан байдаг. Сайд асан ч энэ тухайгаа тухайн үед өөрийн цахим хуудсанд нийтэлж байсныг зарим уншигчид санаж магадгүй.

Хэрвээ тэр үед Х.Тэмүүжин “Би салбарын чинь сайд байна” гэж хэлсэн бол нэгдүгээрт “УИХ-ын гишүүнийг таньсангүй” гэдгээс ч илүү том онигоонд орох байсан биз. Хоёрдугаарт, ажил үүргээ гүйцэтгэж буй албан хаагч нарт өчүүхэн жижиг зүйлээр ч гэсэн дарамт учруулахыг бодоогүй учраас тэр биз. Салбарын сайд хүн өөрөөс нь уучлал хүсээд, ажил үүргээ гүйцэтгэж байгаад нь талархана гэдэг албан хаагчдад ч гэсэн урам юм даа.

Гэтэл Хууль зүйн сайд асан Х.Нямбаатар өчигдөр хорио цээрийн дэглэмийн үед албан үүргээ гүйцэтгэсэн /УОК-оос гаргасан дүрэм журамд “УИХ-ын гишүүний үнэмлэхээр замын хөдөлгөөнд оролцоно” гэсэн зүйл байхгүй учир чуулганы хуралдаан цахимаар явагдаж буй энэ үед Г.Дамдинням гишүүн шалтгаанаар Төрийн ордонд дуудагдсан, эсэх талаар албаны шугамаар асууж тодруулах нь зүйн хэрэг/ цагдаагийн албан хаагчаа өмгөөлөхийн оронд “хувийн дугаарыг нь аваад ир, хариуцлага тооцно” гэсэн явдал /ядаж байхад нөгөөх нь хувийн дугаарыг нь цээжилчихсэн байдаг/ ажил үүргээ гүйцэтгэж буй албан хаагчдад айдас, дургүйцэл төрүүлэхээс өөр ямар тустай билээ. Уг нь "Битгий хуцаж бай. Чиний УИХ-ын гишүүн чинь хэнд хамаатай юм, цагдаа ажлаа л хийсэн байна" гээд сууж байх ёстой хүн шүү дээ, ажил үргийнхээ хувьд бол...

Цагдаагийн алба хаагч хууль, журмыг ягштал сахиулах үүрэгтэй болохоос доошоо дарлаад, дээшээ зусардаад явах нь тэдний ажил биш. Сайд Х.Нямбаатар салбарынхаа алба хаагчдад арай л буруу үлгэрлээд байна даа.    

Мөн өдөр УИХ-ын гишүүн Ц.Мөнхцэцэг бас нэг том факт гаргав. Чуулганы хуралдаанд цахимаар оролцож байсан гишүүн хуралдааны дундуур өөрийн дүрсийг камерт тохируулаад хуралдааныг орхиж явсан явдал олон хүнд “хууран мэхлэгч, хулгайч” гэгдэх шалтгаан болов. Энэ тухай шүүмжлэл, иргэдийн дургүйцлийн хариуд мань хүн “Гэрээсээ онлайн хуралд оролцох тохиолдолд хүүхэд, гэрийнхэн үймүүлэх тохиолдол бишгүй байх юм. Тиймээс гишүүд үг хэлээгүй үедээ вертуал зургаа тавих, камераа хаах зэргээр бүтэн өдрийн чуулганд оролцож байгаа шүү” хэмээн жиргэсэн нь “муу дээр муухай, муухай дээр улцан” гээч болов. Ер нь бол цахим чуулганы үеэр гишүүд дундуур нь явж хоолоо ч хийгээд, хүүхдээ ч хөхүүлээд, аягүй бол гэрээ цэвэрлэж, хогоо ч хаях нь эзэгтэй хүний үүрэг бололтой шүү. УИХ-ын эмэгтэй гишүүдийг цахим хуралдаанд оролцуулахын тулд хажууд нь харгалзагч тавьж өгөх ёстой юм уу, хаашаа.

Б.ЗАЯА