Засгийн газрын ээлжит хуралдаанаас гаргасан шийдвэрийг Ерөнхий сайд У.Хүрэлсүх танилцуулж байна.

Тэрээр "Цар тахал сүүлийн өдрүүдэд улам хүчээ авч, хоёр ба гурав дахь давалгаа гарч, зарим улс оронд гамшгийн хэмжээнд хүрч байгааг манай ард иргэд мэдэж байгаа байх. Өнгөрсөн 10 сарын хугацаанд бид дотооддоо халдвар алдаагүй цөөн улсын нэг байв. 

Засгийн газар, УОК шаардлагатай бүх арга хэмжээг шуурхай авч ажиллаж байгааг ард түмэндээ илтгэе. Бидэнд богино хугацаанд хяналтандаа авах маш чухал байгаа. 

Ард иргэд хүнд нөхцөл байдалд амьдарч байгааг ойлгож байна. Бид цаашдаа цар тахалтай хамт амьдрах нөхцөл үүслээ. 

Монгол Улс өнгөрсөн 10 сарын хугацаанд цэргийн хэллэгээр бол бүслэлтэд байсан. Бид хориглон хамгаалах тулалдаан хийсэн. Харамсалтай нь цар тахлыг дотооддоо алдлаа. Одоо гардан тулалдаанд орж байна. Бид айж сандарч, уурлаж бухимдах шаардлага байхгүй. Дэлхийн бүх улс энэ хүнд цагийг туулж байна. 

Өнөөдрийн байдлаар 30 хүн цар тахал авсан нь тогтоогдлоо. Иргэн Д-тэй холбоотой 15, Сэлэнгэ 10, Дархан-Уул аймагт 4, Говьсүмбэр аймагт 1 хүн халдвар авсан. Энэ бол надад ирсэн хамгийн сүүлийн тоон мэдээлэл юм.

Одоогоор биеийн байдал нь хүнд хүн алга. Сэлэнгэ аймгийн 74 настай эмэгтэйн биеийн байдал сайжирсан. 

Бид цаашид сахилга хариуцлагыг чангатгах хэрэгтэй байна. 

Цар тахлын үед засгийн газрын шийдвэрийг хүлээцтэй хүлээн авч, ухамсартайгаар даган сахин биелүүлж, гэртээ байж, маскаа зүүж байгаад талархал илэрхийлье.

Вакцин гарах сайхан чимээ байгаа ч монголд орж ирэх гэж удна. Бидэнд нэг вакцин бий. Энэ бол "Сахилга хариуцлага" юм.

Ийм учраас манай улсад байгаа гадаад, дотоодын бүх иргэд цар тахлыг таслан зогсоож чадна" гэв.