Одоогоос 14 хоногийн өмнө Сүхбаатар дүүргийн 20-р хороонд гэр бүлийн хоёр хүн бусдын гарт амь насаа алдсан хэрэг гарсан.
Хэргийг цагдаагийн газраас шалгаж, сэжигтэй этгээдийг яаралтай эрэн сурвалжилсны дүнд өчигдөр илрүүлж, баривчилсан байна.
Шалгалтын явцад 30 настай, эрэгтэй Э гэгч нь өөрийн төрсөн эх болох 56 настай Т, хойд эцэг болох 49 настай Б нарын амь насыг хохироосон болох нь тогтоогджээ. Гэмт этгээд хэрэг үйлдэхдээ согтуурсан байсан гэх ба гэр бүлийн маргааны улмаас толгойг нь төмрөөр цохиж, амь насыг нь хохироосон байжээ.
Шүүх эмнэлгийн үзлэгээр талийгаач нарын толгойн хэсэгт олон тооны хатуу зүйлийн үйлчлэлээр үүссэн гэмтэл тогтоогджээ. Хэргийн газраас эд мөрийн баримтаар хоёр ширхэг гар утас болон хүний амь нас хорооход ашигласан байж болзошгүй төмөр трубо хураан авчээ.
Хэргийн шалгалтын ажиллагааг Сүхбаатар дүүрэг дэх цагдаагийн хоёрдугаар хэлтэст явуулж байна.
