МАН-ын Удирдах зөвлөлийн хурлаас Засгийн газрын гишүүдийн нэрсийг өчигдөр баталсан билээ. Монгол Улсын Их Хурлын дэгийн тухай хуульд заасны дагуу шинээр томилогдох сайд нарыг УИХ-д Ерөнхий сайд У.Хүрэлсүх нэг бүрчлэн танилцууллаа.

Энэ үеэр сайдад нэр дэвшигч нараас гишүүд асуулт асуусан юм. 

Зам, тээврийн хөгжлийн сайдад нэр дэвшигч Л.Халтар Дарханы замын талаар ийн хариуллаа. Тэрээр "Нөхцөл байдал хүнд байгаа. Дарханы зам, барилгын ажилд дагалдаж гарч ирэх хүндрэл нэмэгдсэн. Монголд цементийн хомсдол үүсчихээд байна.  Эхний ээлжийн хоёр урсгалтай замыг ашиглалтад оруулахад 55 мянган тн цемент хэрэгтэй байгаа. Бүгдийг нь цементийн үйлдвэрээс нийлүүлэхэд хүндрэлтэй байна.  

Цар тахалтай холбоотойгоор БНХАУ-аас орж ирэх мэргэжилтнүүдийн ирэх хугацаа хойшилсон. Бид анх төлөвлөж байхдаа 2020 оны гуравдугаар сард мэргэжилтнүүд орж ирээд дөрөвдүгээр сард ажлаа эхлүүлэх тооцоолсон. 

Өнөөдрөөс эхлээд цөөн ч гэсэн мэргэжилтнүүд орж ирж байна. Энэ бол тавдугаар багцын мэргэжилтнүүд. 1, 3, 5 дугаар багцын мэргэжилтнүүдийн хувьд нааштай байгаа. Зам, барилгын ажилд хамгийн гол нь гүүр, ус зайлуулах хоолой, мал амьтны гарц гэсэн гурван төрлийн ажил байдаг. Энэ ажил 1 дүгээр багц дээр 100 хувь дууссан. 

2 болон 4 дүгээр багцын хувьд хүнд байна. 14-15 сая ам.долларын багц дээр маш хямдхан үнээр өрсөлдөж орж ирсэн хятадын компаниуд өнөөдөр манайд ирээгүй байна. Араас нь хөөцөлдөж асуухад зарим нь харьяа газраасаа зөвшөөрөл аваагүй байна гэсэн хариу өгч байгаа" гэлээ: 

УИХ-ын гишүүд асуулт, тодруулга дууссаны дараа Ерөнхий сайд У.Хүрэлсүх үг хэлэв. 

Тэрээр "Би үхэхээс бусдыг үзсэн парламентын гишүүн. Би Ерөнхий сайдын хувиар эх орноосоо хулгай хийхгүй. Хэрэв хулгай хийвэл хариуцлага хүлээнэ. 

Их хурлын гишүүд ээ! Засгийн газрын гишүүдээс битгий хууль бус зүйл хүсээрэй. Хэрэв тийм зүйл ажиглагдвал би намын даргын хувиар шалгуулах болно. Дахин хэлье. Засгийн газрын гишүүд ээ! та бүхэн хууль бус юм хийхгүй шүү, үгүй гэж хэлж сураарай" гэлээ. 

Ийнхүү УИХ-ын чуулганы хуралдаанаар Монгол Улсын Засгийн газрын сайд нарын томилгоотой холбоотой гишүүдийн асуулт, тодруулга авч дууссанаар Засгийн газрын гишүүдийг чуулганаар сонссонд тооцлоо.