Улсын Онцгой комиссын Шуурхай штабаас гадаад улсаас иргэдээ татан авах ажлын талаар мэдээлэл хийлээ. 

Өнөөдөр өглөө Москва-Улаанбаатар чиглэлийн тусгай үүргийн онгоцоор ирсэн 170 иргэний 93 хувь нь оюутан байна. Оюутнуудын 89 хувь нь эмэгтэй, 11 хувь нь эрэгтэй байна. 

Мөн өнөөдөр болон маргааш ОХУ-аас Алтанбулаг боомтоор иргэдээ татан авахаар шийдвэрлэсэн. Энэ талаар ГХЯ-ны Консулын газрын захирал Л.Мөнхтүшиг мэдээлэл хийв. 

Тэрээр "Өглөө ирсэн 170 болон өнөөдөр, маргааш Алтанбулаг боомтоор 594 оюутан эх орондоо ирэх бөгөөд тэднийг төмөр замаар Улаанбаатар хотод авчирч, тусгаарлана. Энэ оюутнуудад энгийн сургуулийн хүүхдүүд ч байгаа, манай Хууль зүйн яамны харьяа агентлагуудын шугамаар суралцдаг 244 сонсогчид байгаа. 

Монгол улс дэлхийн бусад улстай харьцуулахад гадаадад гацсан иргэдээ шат дараатайгаар татаж авч байгаа цөөн улсын нэг. Хүн амынхаа тоотой уялдуулан, байгаа мэдээлэлдээ тулгуурлаж үзэхэд манай улс хүн амынхаа 0.27 хувийг гадаадаас татаж авсан байна. Энэ үзүүлэлтээрээ ХБНГУ-ын ард хоёрдугаарт бичигдэж байна. ХБНГУ нь хүн амынхаа 0.28 хувийг гадаад улсаас татан авсан байна" гэлээ. 

Гадаад улсад гацсан монгол иргэдээ эх оронд нь авчрах ажлыг зохион байгуулахаар 900 гаруй төрийн албан хаагч ажиллаж байна.  

Өнгөрсөн хугацаанд, он гарснаас хойш 62111 хүн эх орондоо иржээ. Үүнээс зохион байгуулалттайгаар татаж авсан нь иргэний тоо одоогийн байдлаар 8498 байгаагийн 3480 нь тусгай үүргийн онгоцоор ирсэн байна.