Хятадын зүүн хойд нутаг, Оростой хил залгаа Жилинь мужид коронавирусийн 34 тохиолдол шинээр илэрсэн учраас эрх баригчид хөл хорионы хатуу дэглэм тогтоолоо гэж “South China Morning Post” хэвлэл мэдээлсэн байна.

Хэвлэлд мэдээлснээр халдварын энэ шинэ тохиолдлын ихэнх нь илэрсэн 700 мянга орчим хүн амтай Шулань тойрогт даваа гаригт хөл хорио тогоожээ. Тойргийн эрх баригчдын гаргасан мэдэгдэлд тосгон болон гэр орноосоо хэн ч гарч болохгүй гэнэ. Зайлшгүй шаардлагатай хэрэгцээт бүтээгдэхүүнийг хөл хорионд байгаа хүн амд дэлгүүр, худалдааны байгууллага хүргэж өгөх юм байна. Энгийн иргэдээс өрхийн нэг гишүүн л өдөрт хоёр удаа гарч хэрэгцээт бүтээгдэхүүн, хүнсээ худалдан авч болох гэнэ.

Шулань тойргийн олон нийтийн аюулгүй байдлын ажилтан 45 настай эмэгтэй шинэ төрлийн коронавирусийн халдвараар өвчилсөн нь тогтоогдсоныг эмч нар тавдугаар сарын 7-нд оношлон тогтоосон ч эх үүсвэрийг нь олж тогтоогоогүй байгаа аж. Өнгөрсөн хугацаанд өвчтөн ийш тийшээ яваагүй, олон хүнтэй уулзаагүй гэж байгаа ч 73 хоногийн туршид өвчний халдвар илрээгүй энэ бүсэд халдвар тархах аюул нүүрлэж байна хэмээн ийн хөл хорио тогтоожээ.

Энэ тойрог нь мужийн төв Чанчунь болон Жилинь, хөрш Хуйлунзян мужийн төв Харбин хотоос холгүй байдаг тул энэ хооронд зорчдог нийтийн тээврийг бас зогсоосон байна. Өнгөрсөн долоо хоногт Шулань тойрогт БНХАУ-ын Төрийн зөвлөлийн Ерөнхий сайдын орлогч Сунь Чуньлань ажлаар ирсэн. Хатагтай Чуньлань Шулань болон Цэнмань район, Жилинь хотоор орж орон нутгийн эмнэлэг, эмийн сан зэрэг байгууллагуудын ажилтай танилцсан юм байна. Хэвлэл бас коронавирусийн халдварын тохиолдол шинээр гарсантай холбогдуулаад Шулань тойргийн намын удирдлага, эрүүлийг хамгаалах комиссын тэргүүн зэрэг зургаан албан тушаалтныг ажлаас нь халжээ.

Эх сурвалж: "Ардчилал таймс" сонин