Өнгөрсөн амралтын өдөр мөсөн замын эргүүлийн үүрэг гүйцэтгэж байхдаа "Хөвсгөл" нуурын мөсөнд автомашинтайгаа цөмөрч, амиа алдсан хэрэг гарчээ.

Энэ сарын 3-ны өдөр Хөвсгөл аймгийн нутагт орших “Доод модот булангийн-Үзүүр” гэдэг газар тус аймгийн Алаг-Эрдэнэ сумын Хатгал тосгон дахь Онцгой байдлын газрын Гал түймэр унтраах, аврах 69 дүгээр ангийн механик жолооч, 26 настай, эрэгтэй З нь мөсөн замын эргүүлээр үүрэг гүйцэтгэж байх үедээ 23:00 цагийн орчимд хариуцсан хяналтын цэгээс “Приус-20” загварын суудлын автомашинтай гараад сураггүй алга болсон дуудлага дөрөвдүгээр сарын 4-ний өдрийн 17:55 цагт Онцгой байдлын газарт иржээ. 

Дуудлагын дагуу, аймгийн Онцгой байдал, цагдаагийн алба хаагчид гээд нийт 33 хүн дөрөвдүгээр сарын 5-ны өдөр эрэн хайх ажиллагааг зохион байгуулсан байна. Энэ үеэр “Доод модот булангийн-Үзүүр” гэдэг газар “Хөвсгөл” нуурын мөсөнд цөмөрч живсэн байж болзошгүй мөр илэрчээ.

Иймд тухайн газарт дөрвөн удаагийн гүний шумбалтыг хийхэд 25 метрийн гүнд унаж явсан автомашин, түүнээс 10 метрийн зайд цогцос байсныг олж тогтоож, 14:50 цагт цогцсыг, 18:13 цагт автомашиныг тус тус татан гаргаж, Цагдаагийн газрын дарга, цагдаагийн дэд хурандаа Д.Дашнямаар ахлуулсан бүрэлдэхүүнд шилжүүлэн өгсөн гэж Онцгой байдлын ерөнхий газраас мэдээллээ.

СЭРЭМЖЛҮҮЛЭГ: Цаг агаарын дулааралтай уялдан гол мөрний мөс хайлж, мөс байрандаа хайлах, усан зах үүсэх, харз гүйх зэрэг үзэгдэл ажиглагдаж, мөсний нягт багасан хэврэгшиж байгаа учир иргэд цаг хожих, зам товчлох зэргээр мөсөн дээгүүр явах, авто тээвэр хийхгүй байх, бага насны хүүхдийг гол, мөрөн, нуурын мөсөн дээр тоглуулахгүй байхыг анхааруулж байна.