Токио-Улаанбаатар чиглэлийн тусгай үүргийн онгоц "Чингис хаан" олон улсын нисэх буудалд газардаж, 266 иргэн эх орондоо ирлээ. 

Тусгай үүргийн нислэгийн багт нийт есөн хүн, МХЕГ-ын улсын байцаагчид, ХӨСҮТ-ийн эмч нар ажиллажээ. Тэд нислэг гүйцэтгэснийхээ дараа зорчигчдын адил 21 хоног тусгаарлагдаж, давтан шинжилгээнд хамрагдах юм. Уг нислэгээр 266 зорчигч ирсэн бөгөөд 14 нь нярай хүүхэд байна.

УОК-ын Шуурхай штабын үйл ажиллагаа болон холбогдох албаныхан мэдээлэл хүргэлээ. 

Шуурхай штабын дарга, хурандаа Б.Ууганбаяр: "Бид нислэг болгоны өмнө урьдчилсан бэлтгэл хангаж байгаа. Онгоц дотор мэргэжлийн байгууллагын хоёр хүн үүрэг гүйцэтгэсэн. Хүмүүсийн халууныг үзэж, сэжигтэй шинж тэмдэг илэрсэн хүмүүсийг бусад зорчигчдоос тусгаарлах зэрэг арга хэмжээ авч ажиллаж байгаа. 

Энэ удаагийн нислэгээр өндөр настан 30 гаруй, эрүүл мэндийн шалтгаантай 10 гаруй, хүүхэд 10 гаруй, дамжин ирж байгаа 55 зорчигч, жирэмсэн эмэгтэй гурав, бусад 151 зорчигч байна гэсэн урьдчилсан мэдээг ирүүлсэн. 

Сэжигтэй тохиолдол байх юм бол шууд ХӨСҮТ-рүү тээвэрлэнэ. Өөр өвчтэй зорчигчийг Цэргийн төв эмнэлэг рүү тэвээрлэнэ. Нислэгээр ирж байгаа хүмүүсийг аль болох нэг дор байлгах бодлого барьж байгаа" гэв. 

Гадаад харилцааны яамны Консулын газрын дарга Л.Мөнхтүшиг: "Өнөөдрийн байдлаар гадаадын 45 улсаас 6154 иргэн нутаг буцах хүсэлтээ ЭСЯ-аар дамжуулан илэрхийлээд байна.

Индонезид тэмцээнд оролцоод ирж чадахгүй байсан гурван хүүхэд Токио-Улаанбаатрын тусгай нислэгээр ирсэн. Тус нислэгээр нийтдээ есөн бага насны хүүхэд ирж байна.

Японы Шизүока мужид параолимпын бэлтгэл хийж байгаа хүүхдүүд бас бий. Бидний зүгээс энэ нислэгээр ирэх боломж олгосон ч Японы талаас аюулгүй байдлыг нь хангаад бэлтгэлийг нь хийлгэх боломжтой гэж үзсэн учраас энэ удаагийн нислэгээр бол ирээгүй. Дараагийн нислэгээр ирэх боломжтой.

Өнөөдрийн нислэгээр ирсэн 263 зорчигч шинжилгээнд хамрагдаагүй ирж байгаа. Япон улсад 37.5 хэм халуураагүй бол шинжилгээнд хамруулахгүй гэсэн зарчим баримталж байгаа гэдгээ мэдэгдсэн. Тиймээс  манай иргэд шинжилгээ өгөлгүй ирж байна" гэлээ.

Эх орондоо ирэх хүсэлтэй байгаа иргэдийг ангилвал, бага насны хүүхэд 731, эрүүл мэндийн шалтгаантай 71, ахмад настан 226, жирэмсэн 26, визний хугацаа дуусах эрсдэлтэй 135, байрны асуудалд орж байгаа 375585 оюутан, санхүүгийн хүндрэлд орж байгаагаа мэдэгдсэн 54, бусад шалтгаантай 3954 иргэн мэдээллээ өгчээ.