НИТХ дахь АН-ын бүлгээс цаг үеийн асуудлаар мэдээлэл хийж орлогын төлөвлөгөө тасалдсан нийслэлийн төсөвт тодотгол хийж, тулгарсан асуудлыг яаралтай шийдвэрлэх шаардлагыг Нийслэлийн Засаг дарга С.Амарсайханд хүргүүлэх болсноо мэдэгдэв.

Засгийн газраас аж ахуйн нэгж, байгууллагаас нийгмийн даатгалын шимтгэл, иргэдээс хүн амын орлогын албан татвар авахгүй байхаар шийдвэрлэсэн нь нийслэлийн төсвийн орлогын төлөвлөгөө тасалдах нөхцөл болж байгаа гэв.

2020 оны Нийслэлийн төсөвт нэг их наяд 211 тэрбум 604.3 сая төгрөгийн орлого төвлөрүүлэхээр төлөвлөсөн бөгөөд зургаан сарын хугацаанд татвараас чөлөөлснөөр нийслэлийн төсвийн орлогын 60 гаруй хувийг бүрдүүлдэг ХХОАТ-ын 50 нь бүрдэхээргүй болоод байгаа аж.

Орлого бүрдүүлэх эх үүсвэрүүд тасалдсанаас үүдэн нийслэлийн төсвөөс төвлөрүүлэх 319.4 тэрбум, урсгал зардлыг санхүүжүүлэх 575.5 тэрбум, хөрөнгө оруулалтын ажлуудыг санхүүжүүлэх 362 тэрбум төгрөгийг шийдвэрлэхгүй боломжгүй гэж АН-ын бүлэг үзжээ. 

Тиймээс яаралтай тодотгол хийж, сонгуулийн шинжтэй төсөл арга хэмжээ, гадаад, дотоод томилолт зэрэг урсгал зардлуудыг танаж, хойшлуулж болох хөрөнгө оруулалтын ажлуудыг нь царцаах санал гаргаж байгаагаа мэдэгдлээ. 

Нийслэлийн Ардчилсан намын дарга, НИТХ-ын төлөөлөгч Д.Баттулга "Өнөөгийн байдлаар шаардлагагүй зардлуудыг яаралтай танах хэрэгтэй гэж үзэж байна. Тухайлбал, Зүүн хойд Азийн бизнес аялал жуулчлалын төв болох шоу цэнгээн, олон нийтийн арга хэмжээг зохион байгуулах, тавилга эд хогшил худалдан авах, гадаад дотоодын албан томилолт, туршлага солилцох зардал, нутгийн захиргааны, соёлын ордон барих, аз жаргалтай хотын индекс тооцох зэрэг зардлыг царцаах боломжтой" гэв. 

Мөн тэрээр "Эдгээр танасан зардлыг халдварын голомтод байгаа ажилтнуудад урамшуулал олгох, шаардлагатай тоног төхөөрөмж авахад зарцуулах нь зүйтэй" гэв.