АН-ын нарийн бичгийн дарга О.Магнай өнөөдөр цаг үеийн асуудлаар хэвлэлийн бага хурал хийлээ. Тэр Ерөнхий сайд У.Хүрэлсүхэд хандаж, 2020 оны төсөвт нэн яаралтай тодотгол хийж, иргэн бүрт 1,242,721  төгрөг олгохыг шаардлаа. 

О.Магнай уг шаардлагынхаа тухай "Халдварт вирустэй холбоотой хөл хориог уртасгахын хэрээр эдийн засаг хумигдан, үйлдвэрлэл үйлчилгээний салбар бүхэлдээ дампуурах бодит аюултай нүүр тулж байна. Засгийн газар эдийн засгийг сэргээх бодлогоо цаг алдалгүй тодорхойлж, иргэдэд танилцуулах ёстой ч өнөөдрийг хүртэл бодит бодлого танилцуулсангүй. 

Тиймээс эдийн засгийг тэтгэх бодлогын хүрээнд Монгол Улсын иргэн бүрт 1,242,721  төгрөгийг дөрөвдүгээр сарын эхний долоо хоногт багтаан нэн яаралтай олгохыг шаардаж байна. Энэ онд барих ёстой хоёр замын ажлыг зогсоож, мөнгийг нь иргэддээ өгөх хэрэгтэй. Улсынхаа эдийн засгийг авч үлдэх ёстой гэдэг үүднээс АН энэ шаардлагыг хүргүүлж байна" гэсэн юм.

Гэвч хэвлэлийн бага хурал өндөрлөсний дараа уг шаардлага АН-ын албан ёсны байр суурь уу, эсвэл иргэн О.Магнайгийн байр суурь уу? гэдэг маргаан үүсэв. Хэрвээ АН-ын байр суурь юм бол шаардлагыг тус намын албан бланк дээр үйлдэх нь тодорхой. Хоёрдугаарт намын удирдах байгууллагаар /ядаж удирдлагын түвшинд/ хэлэлцэж шийдвэрлэх ёстой байсан байх.

Харин О.Магнайгийн сэтгүүлчдэд тараасан шаардлагын ард "АН-ын нарийн бичгийн дарга О.Магнай" хэмээн гарын үсэг зурсны дээр тус намын хэвлэлийн албанаас "Энэ бол АН-ын албан ёсны байр суурь биш, иргэн О.Магнайгийн байр суурь юмаа" гэсэн залруулгыг хийлээ. 

(Шаардлагыг бүрэн эхээр нь нийтлэв)

МОНГОЛ УЛСЫН ЕРӨНХИЙ САЙД, МАН-ЫН ДАРГА У.ХҮРЭЛСҮХ ТАНАА
 
Иргэн бүрт 1 сая 242 мянга 721 төгрөг олгохыг шаардах тухай
 
Ковид-19 Вирусийн тархалтын улмаас цар тахал дэгдэн бүх дэлхийг хамарсан эдийн засгийн хямрал болох бодитой нөхцөл байдал үүсээд байна.

Манай улсын хувьд энэ оны 1-р сараас эхэлсэн хөл хориог өнөөдрийн байдлаар 5-р сарыг хүртэл сунгалаа. 

Халдварт вирусээс үүдсэн хөл хориог ийнхүү уртасгахын хирээр эдийн засаг хумигдаж, ажилгүйдэл нэмэгдэн үйлдвэрлэл үйлчилгээний салбар бүхэлдээ дампуурах бодитой аюултай нүүр туллаа. Цаашид  арга хэмжээ авахгүй цаг алдвал улс орны эдийн засаг бүхэлдээ унах нөхцөл байдал ч бий болоод байна. 

Энэ мэт онцгой нөхцөл байдал үүссэн үед ЗГ нь мөн онцгой байдлаар асуудалд хандаж эдийн засгийг сэргээх, эрчимжүүлэх  бодлогоо цаг алдалгүй иргэдэд танилцуулж, хэрэгжүүлэх зайлшгүй шаардлага үүссэн ч, харамсалтай нь өнөөдрийг хүртэл бодитой бөгөөд тодорхой бодлого зорилт танилцуулсангүй өдийг хүрлээ.  

Иймд эдийн засгийг сэргээх тэтгэх бодлогын хүрээнд МУ-ын ҮХ-ийн Тавдугаар зүйлийн 4-т “Төр нь үндэсний эдийн засгийн аюулгүй байдал, аж ахуйн бүх хэвшлийн болон хүн амын нийгмийн хөгжлийг хангах зорилгод нийцүүлэн эдийн засгийг зохицуулна.” мөн арван зургадугаар зүйлд зааснаар  Монгол Улсын иргэн бүрийн эд, мөнгөний тусламж авах баталгаатай эдлэх эрхийг хангах нь төрийн үүрэг байна гэж тус тус заасныг үндэслэн Монгол Улсын Иргэн бүрт 1 сая 242 мянга 721 төгрөгийг  4-р сарын эхний долоо хоногт багтаан нэн яаралтай олгож эдийн засгийг тэтгэх алхмыг яаралтай хийхийг шаардаж байна.
 
АН-ын нарийн бичгийн дарга О.Магнай
2020.03.25