Олон улсын олимпын хорооноос Токио хотноо болох зуны Олимпын наадмыг хойшлуулах хэд хэдэн хувилбарыг хэлэлцэж байгаа талаар “The Times” сонин нийтэлжээ. 

Дэлхийн улс орнуудад коронавирусийн халдвар тархсантай холбоотойгоор Олимпын наадмыг хуваарийн дагуу зохион байгуулах эсэх шийдвэрийг ОУОХ дөрвөн долоо хоногийн дотор гаргана гэж тус хорооны ерөнхийлөгч Томас Бах ням гаригт мэдэгджээ. Эх сурвалжуудын мэдээлж байгаагаар, Олимпын наадмыг яг гурван сараар эсвэл 2021 оны долдугаар сард болгож хойшлуулж магадгүй байгаа аж.

Олон улсын хөнгөн атлетикийн холбоо болон Бразил, Колумби, Норвеги, Словени, Хорватын Олимпын хороо, АНУ-ын Хөнгөн Атлетикийн холбоо, Испанийн хөл бөмбөг, хөнгөн атлетикийн холбооноос Олимпын наадмыг хойшлуулах хүсэлт гаргажээ.

Өнгөрсөн оны сүүлчээр БНХАУ-д бүртгэгдсэн шинэ төрлийн коронавирусийн халдвар дэлхийн 191 улсад тархаж халдвар авсан нийт хүний тоо 300 мянга давж, 13 мянга гаруй хүн нас бараад байна.