Зуны Олимпын галт бамбарыг Грек улсаас Япон улсын хойд нутгийн Мияги муж дахь агаарын цэргийн баазад өнөө өглөө авчирч, цомхон хүрээг хамарсан ёслолын ажиллагаа зохион байгуулжээ.
“Japan Airlines”, “All Nippon Airways” агаарын тээврийн компаниуд хамтран нислэг үйлдэж Мияги мужийн Өөрийгөө хамгаалах агаарын хүчний Мацүшима баазад газарджээ.
Коронавирусийн халдварын улмаас Токиогийн Олимп урьдчилан товлосны дагуу ирэх долдугаар сарын 24-нд эхлэх эсэх нь эргэлзээтэй байгаа.
Наадмыг төлөвлөсний дагуу зохион байгуулна гэж зохион байгуулагчид, Олон улсын олимпын хорооны /ОУОХ/ зүгээс мэдэгдэж байгаа боловч хойшлуулах, цуцлах сонголтыг ч мөн боломжтой хэмээн үзэж байгаа аж.
Токиогийн Олимпын наадмыг зохион байгуулах хорооны тэргүүн Ёширо Мори: “Олимпын галт бамбарыг сүүлийн 56 жилийн хугацаанд анх удаа Японд авчирлаа. Энэхүү бамбар олон хүний итгэл найдварыг гэрэлтүүлнэ гэдэгт итгэж байна.
Бид Дэлхийн эрүүл мэндийн байгууламжийн зөвлөмжид тулгуурлан ОУОХ, Японы Засгийн газар, Токио хотын засаг захиргаатай үргэлжлүүлэн нягт хамтран ажиллаж, наадмын үеэрх аюулгүй байдлыг баталгаажуулна” гэжээ.
Галт бамбарыг Японд авчирсан нь Олимпын наадмыг төлөвлөсний дагуу зохион байгуулах байр суурийг баримталж буй юм.
Галт бамбарыг Японы нутаг дэвсгэрээр аялуулах буухиа Фүкүшима мужаас энэ сарын сарын 26-нд эхлэх аж.