Вьетнам улсад ирэх дөрөвдүгээр сард зохион байгуулахаар төлөвлөж байсан Зүүн Өмнөд Азийн орнуудын холбооны /АСЕАН/ удирдагчдын дээд хэмжээний уулзалтыг хойшлуулжээ.
Дээд хэмжээний уулзалтыг зургадугаар сарын сүүл хүртэл хойшлуулсан бөгөөд тов нв баттай гараагүй байна.
АСЕАН-ы удирдагчдын энэ удаагийн уулзалтыг Вьетнамын Дананг хотын далайн эргийн амралтын газарт зохион байгуулахаар төлөвлөж байжээ. Гэвч дэлхийн улс орнуудад шинэ коронавирусийн халдварын тархалтыг хязгаарлахын тулд яаралтай арга хэмжээнүүдийг хэрэгжүүлж байгаа тул уг дээд хэмжээний уулзалтыг хойшлуулсан аж.
АНУ-ын Лас-Вегас хотноо энэ сарын дундуур зохион байгуулахаар товлосон АНУ-АСЕАН-ы дээд хэмжээний уулзалтыг мөн халдварын тархалтын улмаас хойшлуулсан юм.
АСЕАН-ы бүрэлдэхүүнд Бруней, Камбож, Индонез, Лаос, Малайз, Мьянмар, Филиппин, Сингапур, Тайланд, Вьетнам улсууд багтдаг аж.