“Токио-2020” Олимпын наадмыг коронавирусийн халдварын тархалтын улмаас энэ оны сүүл хүртэл хойшлуулж магадгүй гэж Японы Олимпын наадам хариуцсан сайд Сэйко Хашимото мягмар гаригт мэдээлжээ.

Тэрээр “Токиогийн засаг захиргаа, Олон улсын олимпын хорооны /ОУОХ/ хооронд байгуулсан гэрээнд Олимпын наадмыг 2020 онд багтаан зохион байгуулах талаар тусгасан тул хойшлуулах боломж бий.

Бид Олимпын наадмыг төлөвлөсний дагуу зохион байгуулахын тулд бүхий л хүчин чармайлтыг гаргаж байна” гэжээ.

Зуны XXXII-р олимпын наадмыг ирэх долдугаар сарын 24-нөөс наймдугаар сарын 9-ны хооронд зохион байгуулахаар товлосон байсан.

Олимпыг зохион байгуулах гэрээний дагуу ОУОХ наадмыг цуцлах эрхтэй юм.

Энэ талаар ОУОХ-ны тэргүүн Томас Бах “Токиогийн Олимп амжилттай болно гэдэгт манай байгууллага итгэлтэй хэвээр байна. Тамирчид итгэл дүүрэн, эрч хүчтэйгээр бэлтгэлээ үргэлжлүүлээсэй гэж хүсэж байна” гэж мэдэгдсэн юм.

Коронавирусийн халдварын улмаас спортын олон томоохон тэмцээн, бэлтгэлүүдийг цуцалж, хойшлуулсаар байна. 

БНХАУ-ын Ухань хотод анх гарсан шинэ төрлийн коронавирус /COVID-19/-ийн халдвараар 2020 оны 3 дугаар сарын 4-ний өдрийн 10:00 цагийн байдлаар дэлхийн хэмжээнд нийт 93095 тохиолдол бүртгэгдэж, бүрэн эдгэсэн 50819 тохиолдол байна. Халдварын улмаас 3202 хүн нас баржээ.