Өнөөдөр 15.00 цагт хуралдсан Улсын Онцгой комиссийн шуурхай хуралдаанаас өнөөдөр улс, хот хоорондын зорчигч тээвэр, суудлын галт тээвэр, хувийн авто машины хөдөлгөөнийг гуравдугаар сарын 3-ны өдрийн 08:00 цаг хүртэл үргэлжлүүлэн хязгаарлах шийдвэр гаргасан. Мөн нийслэлд үйлчлэх нийтийн тээврийн хөдөлгөөнийг дээрх хугацаанд зогсоохоор шийдвэрлэснээ мэдээлсэн билээ.
Харин УОК-ийн хуралдааны дараа Нийслэлийн онцгой комисс хуралдаж нийтийн тээврийг тусгай хуваарийн дагуу явуулах тухай захирамж гаргаад байна. Төрийн болон хувийн хэвшлийн байгууллагуудын хэдийн үйл ажиллагаанд саад учруулахгүй байх үүднээс нийтийн тээврийг өглөө, оройд цөөн тоогоор явуулахаар зохицуулалт хийжээ.
Энэ талаар Нийслэлийн Зам, тээврийн асуудал хариуцсан төслүүдийн удирдагч Б.Отгонсүх "Нийслэлийн онцгой комиссоос хоёрдугаар сарын 27-ноос гуравдугаар сарын 3-ны 06:00 цаг хүртэлх хугацаанд нийтийн тээврийг тусгай хуваарийн дагуу явуулахаар шийдвэрлэлээ. Тусгай хуваарь гэдэг нь өглөө, орой ажил цуглах, тарах үед нийтийн тээвэр маршрутынхаа дагуу хангалттай явна. Харин өдрийн цагаар хязгаарлалттай явна” гэв.
Мөн нийслэлийн хэмжээнд үйл ажиллагаа явуулдаг баар, фитнесс, спорт заал зэрэг үйлчилгээний газруудын үйл ажиллагааг гуравдугаар сарын 30-ныг хүртэл түр зогсоох шийдвэр гаргажээ. Харин кафе болон ресторанууд 22.00 цаг хүртэл ажиллах юм байна.
Улаанбаатар хотын харьяалалтай иргэд хөл хорионоос өмнө орон нутгийг зорьсон бол гуравдугаар сарын 3-ны өглөө 7 цаг хүртэл хүртэл хот руу буцаж ирэх боломжгүй. Харин хот орчимд амьдардаг иргэдийг өдөрт цөөн тоогоор хот руу оруулж, гаргахаар зохицуулсан байна.
Сэтгэгдэл (1)