Хамгийн сүүлийн мэдээллээр, коронавирусийн халдварын 71,334 тохиолдол бүртгэгдсэнээс 11,135 хүн эдгэрсэн байна. Биологийн бүтээгдэхүүн үйлдвэрлэгч Хятадын Үндэсний "Биотек Групп" өнгөрөгч баасан гаригт мэдээлэхдээ "эдгэрсэн хүмүүсийн цусны сийвэнгээс коронавирусийн гаралтай уушгины хатгалгаа өвчнийг эмчлэх аргыг хэрэгжүүлж байна" гэжээ. Уг мэдээллийн дараа эдгэрч гарсан 32 иргэн 10,650 мл плазм буюу цусны сийвэнгээ тус группт хандивлажээ. 

Одоогоор коронавирусийн эсрэг вакцин, эм бэлдмэл хараахан гараагүй байгаа ч эдгэрсэн хүмүүсийн цусны сийвэнг клиник эмчилгээнд ашиглаж, тодорхой үр дүнд хүрч байгаа аж. Хятадын Үндэсний "Биотек Групп" нэгдүгээр сарын 20-нд тусгай баг томилж, Хубэй мужаас эдгэрсэн хүмүүсийн цусны сийвэнг цуглуулахыг ажлыг эхлүүлжээ. 

Хоёрдугаар сарын 8-нд Ухань хотын Зянсиа дүүрэгт биеийн байдал нь хүндэрсэн гурван өвчтөнд цусны сийвэнгийн эмчилгээ хийсэн нь амжилттай болсон байна. Өвчтөнүүдийн биеийн байдал эмчилгээнээс хойш 12-24 цагийн дотор сайжирч, үрэвсэл намдсан гэжээ. 

Эдгэрсэн хүмүүсийн цусны сийвэнг эмчилгээнд ашиглах нь үр дүнтэй болохыг SARS хэмээх амьсгалын замын хурц халдварт өвчин, Эбола вирусийн тархалтын үеэр батлагдаж байжээ.

Эх сурвалж: ub.life /Global China Daily/