-Б.Сайнбаяр: Хуурамч шатахуунаас болж монголчууд жилд 50-60 тэрбум төгрөгөөр хохирч байна-

Хуурамч түлш шатахууны улмаас үүсч буй хор хохирлын талаар Монголын Үйлдвэрчний эвлэлийн холбоо болон Монголын шатахуун хэрэглэгчдийн холбооноос хамтарсан мэдээлэл хийлээ. Нефтийн нэмэлт бүтээгдэхүүн болох керосин, нафта зэрэг химийн бодисууд ямар нэг татваргүйгээр хилээр орж ирдэг нь нь хуурамч шатахуун зах зээлд нийлүүлэгдэх гол шалтгаан болж байна гэв.

Монголын шатахуун хэрэглэгчдийн холбооны Гүйцэтгэх захирал Б.Сайнбаяр:

-“Манай холбоо 2018 оноос хойш хуурамч шатахуун буюу химийн бодисоор автомашин явж байгаа талаар олон нийтэд мэдээлсээр байгаа. Холбогдох газрууд арга хэмжээ авахгүй байсаар байсан тул 2018 онд Ерөнхий сайд У.Хүрэлсүхэд хандсан. 

Үр дүнд тухайн оны арванхоёрдугаар сарын 10-нд 201 тоот захирамжийн дагуу холбогдох төрийн байгууллагуудад шатахууны асуудлаар ажлын хэсэг байгуулж шалгахаар болсон. Гэтэл бүтэн жилийн хугацаа өнгөрөхөд шалгалтын үр дүнгийн талаар Ерөнхий сайдын амнаас үг унасангүй. Энэ асуудалд Засгийн газраас арга хэмжээ авч чадахгүй нь ийнхүү тодорхой болсон тул бид тэмцлийн арга хэмжээ зохион байгуулах болно” гэв. 

Манай улсын хэмжээнд керосины жилийн хэрэглээ 3000 орчим тонн. Гэтэл 2012 оноос хойших хугацаанд Монгол Улсын хилээр 1 сая 200 мянган тонн керосин орж ирсэн байна. Үүгээр дизелийн түлш хийж, зах зээлд нийлүүлдэг гэнэ.  Монголын шатахуун хэрэглэгчдийн холбооноос хийсэн тооцоо судалгаагаар Монголд таван машин тутмын нэг нь "нефтийн нэмэлт бүтээгдэхүүн" буюу хуурамч шатахуунаар явж байгаа аж. Үүний уршгаар жилд 50-60 тэрбум төгрөгийн бодит хохирол учирдаг гэсэн тооцоо гарчээ.

Тиймээс хуурамч шатахууны асуудлаар Монголын Үйлдвэрчний эвлэлийн холбооноос Сангийн яаманд хандахаар болжээ. Хуурамч шатахууныг цэгцлэх ганц арга нь нефтийн нэмэлт бодисуудад онцгой албан татвар тогтоох явдал гэж тэд үзжээ.