УИХ-ын гишүүн Н.Номтойбаяр Тагнуулын ерөнхий газрын дарга асан Б.Хурцын хүү Х.Тайвантай зодолдсон гэх бичлэг өнгөрсөн сарын 27-ноос хойш тараад байгаа билээ.

Тэгвэл тус бичлэгтэй холбоотойгоор УИХ-ын гишүүн Н.Номтойбаяр өөрийн твиттер хуудсаараа дамжуулан тайлбар хийжээ. Тэрбээр "Доромж үг даалгүй тавьтаргүй үйлдэл гаргасан нь миний буруу. Ичихийн ихээр ичив. Улстөрийн дайралттай үед бичлэг тасдаж тараасан нь онцгүй ч, надад өөрийгөө зөвтгөх шалтгаан байхгүй. Харин миний буруутай үйлдлээр улстөрч шинэ залуусыг адилтгаж харлуулах хэрэггүй" гэжээ.

Өнгөрсөн долоо хоногт Улсын ерөнхий прокуророос гишүүн Н.Номтойбаярын бүрэн эрхийг түдгэлзүүлэх саналыг УИХ-д тавиад байгаа билээ. Гэвч УИХ-ын гишүүний халдашгүй байдлын дэд хорооны гишүүн Ч.Улаан гадаад томилолттой байгаа гэдэг шалтгаанаар уг асуудлыг шийдэх хурал хойшлоод байгаа юм. Харин хуулийн дагуу бол саналыг УИХ 48 цагийн дотор хэлэлцэн шийдвэрлэх ёстой байдаг.