Туркойз Хилл Ресурс(TRQ) компани 2019 оны дөрөвдүгээр улирлын үйлдвэрлэл болон 2020 оны үйл ажиллагааны тайлангаа мэдээлжээ. 

TRQ-ийн 66 хувийн эзэмшилтэй "Оюутолгой" компани өнгөрсөн жил 146.3 мянган тонн зэс, 241.8 мянган унц алт бүхий баяжмал үйлдвэрлэсэн байна. Өнгөрсөн жилийн нийт үйлдвэрлэл 40.8 сая тоннд хүрч, 2018 оныхоос таван хувиар өсчээ. 

Харин 2020 оны тухайд 140-170 мянган тонн зэс, 120-150 мянган унц алт бүхий хүдэр олборлохоор төлөвлөсөн байна. Мөн ирэх онд ил уурхайд 80-120 сая, далд уурхайн бүтээн байгуулалтад 1.2-1.3 тэрбум ам.доллар зарцуулахаар тайландаа тусгажээ.

“Оюутолгой” өнгөрсөн оны аравдугаар сард гүний уурхайн "босоо ам-2"-ыг барьж дуусгаад буй. Газрын гүн дэх хөрсний бүтцийн өөрчлөлтөөс шалтгаалан уурхайн зураглалыг шинэчлэх шаардлага тулгарсан тул гүний уурхайн бүтээгдэхүүн үйлдвэрлэл 2023 оны зургаадугаар сар хүртэл буюу 16-30 сараар хойшлогдохоор болоод байгааг өнгөрсөн 2019 оны долдугаар сард” Рио Тинто” мэдэгдсэн.

Уурхайн зураг төслийг боловсруулах ажил үргэлжилж байгаа бөгөөд өмнө мэдээлсэнчлэн 2020 оны эхний хагаст бүрэн хийж, хоёрдугаар хагаст нийт зардал хэд болох нь тодорхой болох тухай “Рио Тинто”-ийн Гүйцэтгэх захирал Жан-Себастьян Жак дурджээ. Үүнтэй холбоотойгоор "Оюутолгой"-н гүний уурхайн төслийн хөрөнгө оруулалтын зардлыг 1.2-1.9 тэрбум ам.доллараар нэмэгдүүлэх шаардлагатай хэмээн урьдчилан тооцоолоод байгаа билээ.