Уул уурхайн компаниудыг заналхийлж, мөнгө нэхсэн зарим иргэний хөдөлгөөний удирдлагуудад эрүүгийн хэрэг үүсгэн шалгаж, прокурорын яллах дүгнэлт үйлдсэн байна. Тухайлбал,

“Дэлхийн Монгол Ногоон нэгдэл” ТББ-ын тэргүүн Х.Бээжин уул уурхайн чиглэлээр үйл ажиллагаа явуулдаг аж ахуйн нэгжүүдээс эд хөрөнгө, мөнгө авахаар заналхийлж, нийт 58 сая төгрөгийн хохирол учруулсан хэрэгт,
"Босоо Хөх Монгол" ТББ-ын  тэргүүн Г.Ганхуяг  2019 оны дөрөвдүгээр сарын 14-ний өдөр Дорноговь аймгийн Даланжаргалан суманд “Эко хэлхээ” ХХК-ийн үйл ажиллагааны улмаас орчин бохирдуулсан хэмээн бичлэг хийж мэдээлэл тараасан, үүгээр сүрдүүлэн тус компанийн ерөнхий захирал Б.Энхбатаас 30 сая төгрөг авсан хэрэгт тус тус яллах дүгнэлт үйлдэн шүүхэд шилжүүлсэн байна. Энэ тухай Нийслэлийн прокурорын газрын хяналтын прокурор Д.Эрдэнэсувд мэдээлжээ.

Мөн тэрээр, С.Баяр, С.Баярцогт, Ч.Сайханбилэг нарт холбогдох Монгол Улсын Засгийн газар, “Айвенхоу майнз монголиа инк” ХХК, “Айвенхоу майнз лимитед”, “Рио тинто интернешнл холдингс лимитед” компанийн хооронд байгуулсан хөрөнгө оруулалтын гэрээтэй холбоотой хэрэг прокурорын хяналтад байгаа. Одоогоор өөр мэдээлэл өгөх боломжгүй гэсэн байна.