Өнгөрсөн амралтын өдрүүдэд "Улсын драмын эрдмийн театрыг нураахаар болсон" тухай мэдээллийн зарим сайтууд мэдээлсэн билээ.
Тодруулбал, 2020 онд Монгол Улсын төсвийн хөрөнгөөр санхүүжүүлэх төсөл, арга хэмжээ, барилга байгууламжийн жагсаалтад Улсын драмын эрдмийн театр, Улсын дуурь, бүжгийн эрдмийн театр, Төв номын сан, Байгалийн түүхийн музей, Төв цэнгэлдэх хүрээлэн багтсан бөгөөд тэдгээрийн барилгыг буулгаж, шинээр барихаар болоод байгаа. Үүнд,
- Улсын драмын эрдмийн театр – 52 тэрбум төгрөг
- Улсын дуурь, бүжгийн эрдмийн театр – 54.6 тэрбум төгрөг
- Төв номын сан – 52.4 тэрбум төгрөг
- Байгалийн түүхийн музей – 94.4 тэрбум төгрөг
- Төв цэнгэлдэх хүрээлэн – 80 тэрбум төгрөгийг түүхэн барилгыг буулгаж, дахин шинээр барихад төсөвлөөд байгааг Монголын Архитекторуудын Эвлэлээс эсэргүүцсэн байна.
Энэ талаар нийслэлийн ЗДТГ-ын Хэвлэл мэдээлэлтэй харилцах хэлтсийн дарга Ц.Мөнхбаатар "Улсын драмын эрдмийн театрыг буулгах тухай албан тоот ирээгүй" гэв.
Мөн нийслэлийн Соёл урлагийн газрын дарга Ч.Бат-Эрдэнэ:
-"Драмын театрын барилгыг нураах албан хүсэлт гаргаагүй. Боловсрол, соёл, шинжлэх ухаан, спортын яамнаас мөн энэ талаар ямар нэг шийд гараагүй" гэв. Энэ асуудлаар БСШУС-ын сайд Ё.Баатарбилэг Төрийн ордонд мэдээлэл хийх аж.
Сануулахад Засгийн газар Улсын Драмын эрдмийн театрыг шинэчлэн барих ажлын төсөвт өртөгийг 52 тэрбум төгрөгөөр тооцож, үүнээс энэ онд хоёр тэрбум төгрөгийн санхүүжилт хийхээр төсөвлөөөд байгаа.
