Украины иргэний агаарын тээврийн нисэх онгоцыг санамсаргүй буудан унагаж, 176 хүний амийг хөнөөснөө Иран улс хүлээн зөвшөөрчээ. Дотоод мөрдлөгийн үр дүнд хүний гаргасан алдааны уршгаар пуужин харваж, иргэний нисэх онгоцыг унагасан нь батлагдсан тухай Ираны ерөнхийлөгч Хасан Рухани мэдэгдсэн байна.

Тэрээр уг ослыг “өршөөх аргагүй алдаа” гэж тодорхойлсон байна. Тухайн үед нисэх онгоц Ираны Хувьсгалт Гвардын нууц байгууламжийн ойролцоо нисч байснаас дайсны нисэх онгоцтой андуурагдсан гэж армийнхан мэдэгджээ.

Лхагва гаригт Ираны зэвсэгт хүчин Ирак дахь АНУ-ын цэргийн хоёр баазад агаарын цохилт өгснөөс хэдхэн цагийн дараа Тегеранаас Киевийг зорьсон Украины агаарын тээврийн PS752 дугаартай нислэгийн онгоц осолдсон юм. Осол гарсны дараа тус улсын ISNA агентлаг онгоц осолдсон шалтгааныг "техникийн саатлаас үүдэн осол байх магадлалтай" хэмээн мэдээлж байв. Мөн өнөөдрийг хүртэл Ираны эрх баригчид Украины онгоцыг унагаснаа хүлээн зөвшөөрөөгүй байсан юм. 

Гэвч Украины иргэний агаарын тээврийн онгоцыг Ираны пуужин харваж унагасан гэж үзэж байгаагаа АНУ-ын албаны хүмүүс хоёр өдрийн өмнө мэдэгдсэн билээ. Пуужин харвахаас өмнө Украины нисэх онгоцыг Ираны радар онилоод байсан бөгөөд Boeing 737-800 нисэх онгоц Тегеранаас Киевийн чиглэлд хөөрөөд хоёр минут болж байхад газар-агаар ангиллын хоёр пуужин харвасныг АНУ-ын хиймэл дагуул бүртгэжээ. 

Хохирогчдын ихэнх нь иран гаралтай Канадын иргэд байсан ба зорчигчдын дотор Швед, Британи, Афганистан, Германы иргэд ч бас байжээ.

Ерөнхийлөгч Хасан Рухани твиттер хуудастаа “Сүйрэл дагуулсан алдаа гаргасандаа Иран улс гүнээ харамсаж байна” хэмээн  бичсэн байна.

Эх сурвалж: AFP, BBC