Монгол Улсын Засгийн газраас УИХ-д өргөн мэдүүлсэн “Иргэдийн тэтгэвэр барьцаалсан зээлийн төлбөрийг төрөөс нэг удаа төлөх тухай” хуулийн төслийг УИХ өнөөдөр эцэслэн батлав.
Уг хуулийг батлахтай холбогдуулан ШИНЭ намаас тэтгэврийн зээлгүй болон бага зээлтэй ахмадуудын эсэргүүцлийн жагсаалыг өнөөдөр үдээс өмнө Д.Сүхбаатарын талбайд зохион байгууллаа.
Тэд зөвхөн зээлтэй ахмадын өрийг тэглэх нь шударга бус явдал гэж үзэж байгаа бөгөөд баялгийг тэгш хуваарилахыг шаардав.
Жагсаалын үеэр УИХ-ын гишүүн Ж.Батзандан "Монголын баялгийг ард түмэнд нь шударгаар хуваарилахыг шаардаж байна. Ахмадын тэтгэврийн тэглэх нэрээр банкны луйвар хийх гэж байгаа төрийн өндөрлөгүүдийг хараад би ичиж байна. Өнөөдөр ШИНЭ намаас зохион байгуулж байгаа үндэсний хэмжээний хоёр санал асуулга дээр та бүхнийг гарын үсэг зурахыг хүсч байна" гэв.
Харин жагсаалд оролцож буй ахмадууд "Би оны өмнөхөн тэтгэврийн зээлээ хаалгасан учраас тэтгэврийн зээлгүй ахмадын тоонд орж байна. Тэгсэн ч хуулийн дагуу би байгалийн баялгаасаа хүртмээр байна. 420 ахмадаа ялгалгүйгээр тэгш хуваарихыг хүсч байна" гэж байв.
