Хөдөлмөр, нийгмийн хамгааллын сайд С.Чинзориг цаг үеийн асуудлаар мэдээлэл хийлээ. 

ХНХ-ын сайд С.Чинзориг: "Би 2017 оны 10-р сарын эхээр ХНХ-ын сайдаар томилогдсон ирсэн. Энэ оны 11-р сарын байдлаар Капитал банканд Нийгмийн даатгалын сангийн 228.1 тэрбум төгрөг байсан. Үүнээс 20 тэрбум төгрөг нь хадгаламжинд байсан. 

Мөнгөн хөрөнгийг 2013-2017 оны хооронд тус банканд байршиж байсан. Миний бие сайдын ажлыг хүлээж авахдаа нэг ч төгрөгийг нэмж тус банканд байршуулаагүй, гэрээ байгуулаагүй гэдгээ хариуцлагатайгаар мэдэгдэж байна.

2017 оны 12-р сарын 26-ны өдрийн байдлаар хадгаламжийн гэрээ дуусаж, 79 тэрбум төгрөгөө авах хүсэлт тавихад банкны санхүүгийн байдал тааруу хэмээн мөнгөө авч чадаагүй. 2018 оны 6-р сар хүргэсэн. Гэрээгээ цааш сунгахгүй гэж явсаар нэлээд хугацаа алдсан. Харин Нийгмийн бодлогын байнгын хорооноос өгсөн чиглэлийн дагуу гэрээг есөн сараар сунгасан. 

Манайх гэрээгээ сунгахгүй гэж хэлсэн. Өр барагдуулах явц удаан явсан. Улмаар 2019 оны 5-р сард Монголбанкнаас Капитал банкыг татан буулгасан. Миний хувьд сайд болсноос хойш тус банкинд нэмж гэрээ байгуулаагүй, харилцахад байсан мөнгийг хадгаламж рүү шилжүүлж гэрээ байгуул гэсэн үүрэг өгсөн. 

Монголбанкны Ерөнхийлөгчтэй өчигдөр уулзсан. Ингэхэд үндсэн хөрөнгийг барьцаалж, нийгмийн даатгалын сангийн өрийг барагдуулах хувилбарын талаар ярилцсан. Нэг асуудал үүсээд байгаа нь Капитал банкны удирдлагуудад эрүүгийн хэрэг үүсгэн шалгаж байгаа юм байна. Тиймээс үндсэн хөрөнгүүдийг хөдөлгөх боломжгүй болоод байгаа. Хэрвээ үндсэн хөрөнгөөс өр барагдуулахаар болбол зах зээлийн үнэлгээ, чанарыг сайтар тодорхойлох шаардлагатай. 

Капитал банканд Нийгмийн даатгалын сангийн 105 тэрбум төгрөг бий. Цаашид нийгмийн даатгалын сангийн мөнгийг Засгийн газрын үнэт цаасыг худалдан авах байдлаар арвижуулах чиглэлээр ажиллах шийдэлд хүрээд байна. Ингэвэл хүү нь тодорхой хэмжээгээр буурахаар байгаа. Гэхдээ хүүгийн орлогын хойноос хөөцөлдөх биш, сангийн мөнгө эрсдэлгүй байх ёстой" гэлээ.