Эхнэртээ уурласан халамцуу эр тайвшруулах эм 100 ширхэгийг худалдаж авчээ. Энэ явдал Өмнөговь аймгийн Ханбогд суманд болсон байна. Ханбогд сумын Хайрхан багийн Цагаан хаданд “Итгэл” эмийн санд эхнэртээ уурласан эр халамцуу ирж, 100 хлорфениман /демидрол/ авчээ.  Их эмч мэргэжилтэй ч эм барих эрхгүй хүн их хэмжээний тайвшруулах эмийг үйлчлүүлэгчид өгснөөр хүний аминд хүрэх шахсан байна. Хлорфениман эмийг жоргүй олгодог хэдий ч сэтгэл санаа нь тогтворгүй яваа согтуу хүнд тайвшруулах, нойрсуулах үйлчилгээтэй эмийг их хэмжээгээр өгснөөрөө мэргэжлийн ноцтой алдаа гаргасан гэсэн үг. Азаар яаралтай тусламжийг цагт нь үзүүлснээр үйлчлүүлэгчийн ходоодыг угааж, амийг аварсан байна.

Болсон явдлын талаар Ханбогд Сум дундын эмнэлгийн салбарын эрхлэгч Б.Тогосмаагаас тодруулахад,

-"Дөрвөн ширхэг эм уусан хүн ирээд, хордлого тайлах эмчилгээ хийгээд буцаад явсан. Хэрэв авсан эмээ бүгдийг нь уусан бол аюултай зүйл болох байлаа. Мэргэжлийн бус эмнэлэг, эмийн санд тусгай зөвшөөрөл олгосон газар, холбогдох байгууллагууд анхааралдаа авахгүй бол ахиад ийм ноцтой алдаа гаргахыг үгүйсгэх аргагүй.  Эм хоол биш, хор.  Зөв уувал эм, буруу уувал хор шүү дээ" гэв.