Өнгөрөгч лхагва гаригт иргэн Ц.Пүрэвдорж цагдаагийн алба хаагч өөрийг нь хууль бусаар дуудаж байцаасан, хүч хэрэглэж, хилс хэрэг тулган их хэмжээний мөнгө төлөх амлалт бичүүлж авсан тухай сэтгүүлчдэд хандаж мэдээлэл хийсэн.
Энэ асуудлыг хэрхэн шийдвэрлэх болсон талаар УЕПГ-аас тодруулахад:
-"Иргэн Ц.Пүрэвдоржид эрүү, шүүлт тулгасан гэх асуудлыг шалгахаар болсон. Энэ асуудалд холбогдох, хууль журамд заасны дагуу хяналт тавьж байна.
Гэрч, хохирогч, иргэний нэхэмжлэгч, иргэний хариуцагч, шинжээч, яллагдагчийг мэдүүлэг авах, шийдвэр танилцуулах, мөрдөн шалгах ажиллагаанд оролцуулахдаа хэрхэн дуудахыг Эрүүгийн хэрэг хянан шийдвэрлэх тухай хуулиар зохицуулсан. Прокурорын мэдэгдэх хуудсаар дуудахад хүндэтгэн үзэх шалтгаангүйгээр хүрэлцэн ирээгүй бол албадлага хэрэглэх, хариуцлага хүлээлгэх үндэслэл болдог.
Өөрөөр хэлбэл, тухайн хүнийг албадан ирүүлэх, яллагдагчид бол цагдан хорих таслан сэргийлэх арга хэмжээ авах үндэслэл болно. Харин мөрдөгчийн дуудсанаар хүрэлцэн ирээгүй нь албадлага хэрэглэх, хариуцлага хүлээлгэх үндэслэл болохгүй" гэв.