Катар Улсын Доха хотноо болж буй буудлага спортын 14 дэх удаагийн Азийн тивийн аварга шалгаруулах тэмцээнд оролцож, 25 метрийн спорт гар бууны төрөлд 587 оноогоор шигшээ наймд шалгарснаар "Токио-2020" олимпийн наадамд оролцох эрхээ авсан билээ. Хөдөлмөрийн баатар маань үргэлжлүүлэн финалд хүчтэй өрсөлдөж, мөнгөн медаль хүртлээ.
Азийн аварга шалгаруулах тэмцээний эхний өдөр мөн эмэгтэйчүүдийн 10 метрийн хийн урт бууны төрөлд О. Есүгэн “Токио 2020” олимпын эрх авсан ба Монголын мэргэн буучид ийнхүү олимпийн дөрвөн эрхтэй болоод байна.
Хөдөлмөрийн баатар маань өөрийн сошиал хуудсандаа:
"... Аавынхаа нэрийг өөрийнхөө нэртэйгээ
Aрмийнхаа нэрийг Aлдрынхаа нэртэйгээ
Aваргынхаа нэрийг ардаас төрөх аваргуудтайгаа
Aрд түмэндээ дуудуулж, цоллуулж яваарай... гэж хэлснээр хичээж л явна" хэмээн бичжээ.
Хөдөлмөрийн баатар О.Гүндэгмаа нь "Атланта 1996" олимпоос хойш "Сидней-2000", "Афин-2004", "Бээжин-2008", "Лондон-2012", "Рио-2016", "Токио-2020" гээд долоон олимп дарааллан оролцохоор болж Монгол улсад түүхэн амжилт тогтоолоо.
Одоогоор эмэгтэй тамирчдын хувьд хамгийн олон олимпод оролцсон рекорд амжилт найм байдаг байна. Гүржийн буудлагын тамирчин Сөүлийн олимпын аварга, Нино Салуквазе найман олимпод оролцсон бөгөөд “Токио 2020” олимпын эрхээ авсан тул ирэх жил ес дэх олимпдоо оролцсоноор дэлхийн рекордыг тогтоох аж.
