Сайжруулсан түлшний асуудлаар өнөөдөр Цагдаагийн ерөнхий газар, нийслэлийн Мэргэжлийн хяналтын газар, нийслэлийн Онцгой комиссоос хамтарсан мэдээлэл хийлээ.

Засгийн газрын 2018 оны 62-р тогтоолоор Улаанбаатар хотод түүхий нүүрс хэрэглэх, нэвтрүүлэхийг хориглож, энэ жилээс нийслэлийн иргэд сайжруулсан шахмал түлш хэрэглэж эхлээд байна. Үүнтэй холбоотойгоор аравдугаар сарын 22 буюу өнөөдрөөс нийслэлийн өндөрлөг газруудад утаа ихтэй байршлыг тогтоох хяналтын цэг ажиллуулж эхэлснийг мэдэгдлээ.

Нийгмийн хөгжлөө дагаж, иргэд амьдрах дадлаа өөрчлөх шаардлагатай

Сайжруулсан түлш хэрэглэх явцдаа угаартсан иргэдийн тоон мэдээллийг ЦЕГ-ын Нийтийн хэв журмыг хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалан өглөө.

Ж.Амгалан: 

-Сайжруулсан шахмал түлшийг хэрэглэх явцад иргэд амь насаа алдах, угаартах явдал хэд хэдэн удаа гарсан. Тодруулбал, зургаан дүүргийн 28 хороонд 538 иргэн хийн хордлогын улмаас эмнэлгийн тусламж авч, одоогоор 41 иргэн эмчилгээ хийлгэж байгаа тоо бий. Харин харамсалтайгаар найман иргэн нас барсан байна. Хийн хордлого авсан иргэдийн 226 нь бага насны хүүхэд байна.

Хүйтний улирал эхэлсэн тул түүхий нүүрсийг нэвтрүүлэхээр оролдох нь ихэссэн. Үүнд Улаанбаатар хотын эргэн тойронд хяналтын цэгүүд ажиллан, хяналтаа тавьж байгаа. Нийгмийн хөгжлөө дагаж, иргэд амьдрах дадлаа өөрчлөх шаардлагатай байна. 

"Түлшинд эргэлзэх хэрэггүй. Чанарыг бид хариуцъя"

Нийслэлийн Мэргэжлийн хяналтын газрын дэд дарга С.Даваасүрэн: 

-Сайжруулсан түлшийг үйлдвэрлэх явцад мэргэжлийн хяналтын байгууллагаас 24 цагаар тогтмол хяналт тавьж байгаа. Түлшинд эргэлзэх хэрэггүй. Үүнийг бид хариуцъя. Харин зөв галлагаа, зуух, яндангийн аюулгүй байдлаа иргэд олон нийт маань хариуцах хэрэгтэй байна. 

Нэг хороо, нэг айл гэхгүйгээр зуух, янданг нь шалгаж, зөв галлагааг заах хэрэгтэй байгааг холбогдох газар, ажилтнуудад уриалъя. Төрийн бус байгууллага олон бий. Тэд нар ч үүнд хамтран ажиллах хэрэгтэй.

Сайжруулсан түлшний сайн тал нь ялгарч буй утаа нь өнгөгүй, үнэргүй тул иргэд угаарын хий ялгарч байгааг мэдэхгүйгээр гүн хордлогод орж байна. Харин түүхий нүүрсний утаа үнэртэй, өнгөтэй тул иргэд нүүрсний утаа үнэртээд эхэлмэгц, салхи оруулах зэргээр урьдчилан сэргийлдэг байсан.