Өчигдөр буюу ням гаригт Хандгайт орчимд шинэ цасан дээр баавгайн мөр олдсон талаар эргүүл хяналтынхан мэдэгджээ. Мөрийг шалгахад нас бие гүйцсэн баавгайн мөр байсан. Мөн хоёр өдрийн өмнө бямба гаригт Улиастайн Шарын аманд мөр байгаа талаар иргэдээс мэдээлэл иржээ.

Богд уул орчимд Ан амьтан хамгаалах нийгэмлэгийнхэн баавгайн мөр, баас илрүүлсэн талаараа мөн өөрсдийн фэйсбүүк хуудастаа бичсэн байна. Мэдээллийг Богд уулын хамгаалалтын захиргаа хариуцан  хүлээж авсан талаар Нийслэлийн Байгаль орчны газрын Амьтан, ургамал хариуцсан мэргэжилтэн Ц.Цолмонбаатар мэдээлжээ.

Тиймээс байгаль хамгаалагчид ойтой ойр амьдарч байгаа иргэдэд мах, хүнсний бүтээгдэхүүнээ гадаа ил хадгалахгүй байх талаар зөвлөмж, мэдээлэл хүргүүлж байна. Мөн иргэдийг ганц нэгээрээ ой мод руу зорчихгүй байхыг зөвлөж байна. Баавгай харсан тохиолдолд нуруугаа харуулахгүй, ухарч холдоод зугтах, нүд рүү эгцэлж харахгүй байхыг амьтан судлаачид зөвлөсөн байна.

Мөн Нийслэлийн Засаг дарга энэ сарын 16-ны өдөр А/1059 тоот захирамж гарган зэрлэг амьтан ялангуяа баавгайтай холбоотой асуудлыг газар дээр нь очиж шийдвэрлэх зэрлэг амьтадтай холбоотой эрсдэлээс урьдчилан сэргийлэх нийслэлийн шуурхай багийг байгуулжээ.

Шуурхай багийнханд унтуулгын буу, амьд баригч зэргийг авах зардлыг шийдвэрлэж өгчээ. Шуурхай багийг НБОГ орлогч дарга ахлах бөгөөд бүрэлдэхүүнд Хан Хэнтийн улсын тусгай хамгаалалттай газруудын хамгаалалтын захиргаа, Богдхан уулын дархан цаазат газрын Хамгаалалтын захиргаа, Горхи-Тэрэлжийн байгалийн цогцолборт газрын хамгаалалтын захиргаа, Нийслэлийн Цагдаагийн удирдах газар, Нийслэлийн Мэргэжлийн хяналтын газар, Нийслэлийн Онцгой байдлын газар, Зоонозын өвчин судлалын үндэсний төв, Мэргэжлийн анчдын холбоо, Агнуур судлалын нийгэмлэгийнхэн багтсан байна.

Зэрлэг амьтдын учруулж болзошгүй аюул, эрсдэлээс өөрийгөө болон бусдыг хамгаалах зорилгоор урьдчилан сэргийлэх зөвлөмжтэй танилцаж, зэрлэг амьтад суурьшлын бүс рүү орж ирсэн тохиолдолд Шуурхай багийн 99995899 дугаар, Нийслэлийн Шуурхай удирдлага, зохицуулалтын төвийн 11310005 дугаарт цаг алдалгүй мэдэгдэхийг НБОГ-аас зөвлөж байна.