УИХ-ын чуулганы нэгдсэн хуралдаан болж байна. 

Өнөөдрийн хуралдаанаар Бүгд Найрамдах Беларусь болон Арабын Нэгдсэн Эмират улсуудад Элчин сайдын яам нээх асуудлыг хэлэлцэх бол үдээс хойших хуралдаанаар шахмал түлштэй холбоотой С.Бямбацогт гишүүний асуулгыг хэлэлцэх юм. Мөн бусад асуудлыг цаг сунган хэлэлцэх болсныг УИХ-ын дарга танилцууллаа. 

УИХ-ын гишүүд хэлэлцэх асуудалтай холбогдуулан үг хэлж, санал гаргасан бөгөөд энэ үеэр УИХ-ын дэд дарга Л.Энх-Амгалан Түр хорооны гишүүдэд хандаж тайлбар хийв. Тэрбээр, ОУПХ С.Зоригийн хэргийг улс төрийн зорилгоор ашиглахгүй байхыг зөвлөснийг сануулаад тус байгууллагын нэрийг барьж худал мэдээлэл тараахаа боль гэв.

Л.Энх-Амгалан:

--Ж.Батзандан, Л.Болд нарын гишүүдийн өчигдөр хийсэн мэдээллийн талаар тайлбар хийх нь зүйтэй байх гэж бодлоо. УИХ-аас байгуулагдсан Түр хороо ажлаа хийх хэрэгтэй байна. ОУПХ-ноос ирүүлсэн албан бичгийг есдүгээр сарын 6-нд 12 хүн авсан байх ёстой. Ж.Батзандангийн цахим шууданд ирчихсэн байгаа. Та цахим шуудангаа шалгаж бай. Энэ албан бичгийг орчуулах ажил есдүгээр сарын 7-ноос ГХЯ-нд эхэлсэн. Гэтэл ГХЯ-ны хэлстийн даргыг халж байж дарагдсан байсан бичиг баримтыг ил болголоо гэж худал ярихаа боль. Л.Болд гишүүн зургаан удаа парламентад сонгогдсон, ГХ-ийн сайд хийж байсан хүн ийм байдлаар асуудалд ханддагаа боль. 

ОУПХ дүгнэлтийнхээ төгсгөлд С.Зоригийн хэргийг улс төрийн зорилгоор ашиглахгүй байхыг зөвлөсөн байна. Монгол Улс саарал жагсаалтад орох гэж байгаа эгзэгтэй үед ОУПХ-ны дүгнэлтийг барьж худал мэдээлэл тарааж болохгүй" гэлээ.