Монгол Улсын Ерөнхий сайд У.Хүрэлсүх Бүгд Найрамдах Казахстан Улс/БНКУ/-ын Ерөнхий сайд А.У.Мамины урилгаар энэ сарын 10-12-нд тус улсад албан ёсны айлчлал хийнэ. Уг айлчлалын үеэр байгуулагдах хэлэлцээ, айлчлалын хамрах хүрээний талаар Ерөнхий сайдын гадаад бодлогын зөвлөх Б.Мөнхжин:
-Ерөнхий сайдын албан ёсны айлчлалыг өндөр түвшний айлчлалын давтамжаа хадгалж байгаа стратегийн ач холбогдолтой гэж хэлж болно. Монгол Улс Төв Ази, тэр дундаа Казахстан улс руу чиглэсэн бодлогоо эрчимжүүлж, шинэ шатанд гаргахыг оролдож байна.
Ерөнхий сайд У.Хүрэлсүх БНКУ-ад айлчилж байгаа Монголын хоёр дахь Ерөнхий сайд болж байна. Өмнө нь 1994 онд П.Жасрай гуай айлчилж байсан. Энэ удаагийн айлчлалыг товч тодорхой бөгөөд үр дүнтэй, шуурхай хийх зарчим барьж, бэлтгэлээ хангаж байна. Айлчлалын үеэр Засгийн газрын түвшний, төрийн байгууллагууд хоорондын, хувийн хэвшлийн гээд гэрээ хэлэлцээрүүд зурагдана.
Хоёр орны хоорондох худалдааны эргэлт бага байгаа. Бид Төв Ази тэр дундаа Казахстан улс руу чиглэсэн бодлогоо эрчимжүүлье, харилцаагаа шинэ түвшинд гаргаж, хамтарсан бизнесүүд бий болгохыг зорьж байна. Хамтарсан бизнесүүд хөгжих нь хоёр орон цаашдаа урт хугацаанд харилцаагаа хөгжүүлэх нөхцөлийг бүрдүүлнэ. Тиймээс айлчлалын бүрэлдэхүүнд бизнесийн салбарынхныг нэлээд өргөнөөр хамруулсан. Нийтдээ 60 гаруй бизнесийн байгууллагын төлөөлөл Казахстаны бизнес форумд оролцоно. Казахстаны талаас ч гэсэн тодорхой амжилтад хүрсэн, нэр хүндтэй компаниудаа форумд оролцуулна гэв.
