Гадаад харилцааны яамны Нээлттэй хаалганы өдөр Д.Сүхбаатарын талбайд болж байна.

Нээлттэй хаалганы өдрөөр Улаанбаатар хотод байрлаж буй Америк, Солонгос, Казахстан, Аргентин зэрэг 16 улсын Элчин сайдын яам өөрсдийн үйл ажиллагааг танилцуулахаас гадна улс үндэстнийхээ уламжлалт ахуй, хоолны соёлын талаар танилцуулж байна. 

Түүнчлэн Гадаад харилцааны яамны Консулын газраас гадаад зорчихдоо юуг анхаарах, эрх зөрчигдсөн тохиолдолд хаана хандах вэ зэрэг талаар зөвлөгөө мэдээлэл өгч, Гадаад харилцааны Төв архиваас Ватиканы нууцын архивын газраас хүлээн авсан түүхэн захидлуудыг олонд дэлгэн үзүүлж байна. 

Тухайлбал, 1288-1290 онд Ромын пап IV Николас Ил хаан Аргун нарын харилцсан захидал, 1263 онд Ромын пап IV Урбанаас Ил-Хан Хүлэгүд илгээсэн захидал зэрэг 700 гаруй жилийн тэртээх түүхэн ховор баримтуудыг харах боломжтой. Өглөө 11.00 цагт эхэлсэн арга хэмжээ оройн 17.00 цаг хүртэл үргэлжилнэ.

Өдөрлөгийн үеэр АНУ-ын Элчин сайдын яамны Олон нийттэй харилцах албаны дарга Роберт Тэйт АНУ-д хөдөлмөр эрхлэх боломж бүхий Н2 ангиллын визийг хэрхэн авах талаар мэдээлэл өглөө. 

Роберт Тэйт:

-"Монголчууд АНУ-д ажиллах, суралцах боломж маш их бий. Тухайлбал,

• сурагч солилцооны FLEX хөтөлбөр,
• их, дээд сургуулийн оюутнууд зуны амралтаараа ажиллах боломжтой Summer work and travel хөтөлбөр,
• Fullbright тэтгэлэгт хөтөлбөр
• залуу мэргэжилтнүүдийг дэмжих LEAD хөтөлбөр зэргийг дурдаж болно.

Мөн сүүлийн үед нээгдсэн визний шинэ ангилал болох Н2-р олон монгол иргэн АНУ-д ажиллахаар зорьсон. Энэхүү визний гол шалгуурын нэг нь тухайн иргэнийг ажиллуулах гэж буй байгууллагаас нь албан ёсны урилга илгээсэн байх ёстой" гэв. Мөн хувь хүн, албан байгууллага нь иргэдийг найдвартай зуучилж өгнө гэх нэрийн дор залилан хийсэн тохиолдол гарч байгаа учир баталгаатай мэдээллийг АНУ-ын Элчин сайдын яамны вэб хуудсаас авахыг зөвлөлөө.