Жүдо бөхийн дасгалжуулагчид өнөөдөр бүрэн бүрэлдэхүүнээрээ ажлаа өглөө. Манай жүдочид энэ жил ДАШТ-ээс ганцхан хүрэл медаль хүртэн, тааруу амжилт гаргасан учраас Жүдо бөхийн холбооны ерөнхийлөгч Х.Баттулга шигшээ багийн дасгалжуулагчдыг хариуцлага хүлээж, ажлаа өг гэсэн байна.

Монголын жүдогийн шигшээ багийн ахлах дасгалжуулагчаар Хөдөлмөрийн баатар О.Балжинням, туслах дасгалжуулагчаар ДАШТ-ий хүрэл медальт, Гавьяат тамирчин Хишигбатын Эрдэнэт-Од , ДАШТ-ий хүрэл медальт, Гавьяат тамирчин Д.Баттулга, Гавьяат дасгалжуулагч Ш.Цэвэлмаа, ОУХМ Гантөмөрийн Дашдаваа, япон дасгалжуулагч Торий Томоо нар ажиллаж байв.

Эдгээр дасгалжуулагчдын хүчээр манай тамирчид 2017 оны ДАШТ-нд зургаан медаль авсан дээд амжилтыг тогтоож, сүүлийн зургаан ДАШТ дараалан медаль хүртжээ. Хоёр удаагийн олимптойгоо нийлээд найман жил дараалан 16 медаль хүртэж ард түмнээ баярлуулсан байна.