2019-2020 оны хичээлийн жилд Ерөнхий боловсролын сургуулийн дунд, ахлах ангийн сурагчдыг түрээсийн сурах бичгээр хангахаар болсон. Хичээлийн шинэ жилийн эхний долоо хоног дуусаж буй ч сурах бичгүүд сурагчдын гар дээр очоогүй байна.

Засгийн газрын хуралдааны 2009 оны 28 дугаар тэмдэглэлээр бага ангийн сурагчдыг сурах бичгийг төрөөс 100 хувь дааж, 6-12 дугаар ангийн хүүхдүүдийн сурах бичгийн 40 хувийг төрөөс даахаар болсон.

Үлдсэн 60 хувь буюу 2019-2020 оны хичээлийн жилд ахлах, дунд ангийн 181 мянга гаруй сурагчийн сурах бичгийг түрээсээр хангах юм байна. 

Өмнө жилүүдэд хэвлэлийн компаниудад сурах бичиг хэвлэх эрх өгч, үнийн дээд хязгаарыг нь тогтоож өгдөг, компаниуд харьцангуй цөөн тоогоор хэвлэн борлуулж байсан тул хүрэлцээ хангамж бага байж. Тиймээс сурах бичгийн түрээсийн тогтолцоог хэрэгжүүлэхээр 2010-2015 онд Азийн хөгжлийн банкны санхүүжилтээр туршилтын төсөл хэрэгжүүлсэн нь амжилттай болж, сурах бичгийн хангалт 85-90 хувьд хүрчээ. Одоогоор хэвлэлийн компаниуд дунд худалдан авах ажиллагаа явуулж дуусан холбогдох материалуудыг Азийн хөгжлийн банк руу хүргүүлэн, хариу хүлээж байгаа гэнэ. 

БСШУСЯ-ны Ерөнхий боловсролын бодлогын газрын мэргэжилтэн Р.Балжинням:

-"Азийн хөгжлийн банкнаас худалдан авах ажиллагааны материалуудыг нягталж байгаа учраас хэвлэлт хүлээгдэж байна. Хэрэв Азийн хөгжлийн банкнаас зөвшөөрч, санхүүжилт олговол хэвлэж эхэлнэ. 

Энэ сард багтан сурах бичгүүдийг  хэвлэн нийлүүлэх үйл ажиллагааг зохион байгуулж дуусгана. Ерөнхий боловсролын сургуулийн бүх ангид хэрэглэх сурах бичгүүдийг цахим орчинд байршуулсан байдаг. Тэндээс үзэх боломжтой бөгөөд шаардлагатай тохиолдолд хэвлээд хэрэглэх боломжтой.

Ингэснээр хичээлийн явцад ямар нэг хүндрэл үүсэхгүй бөгөөд гадуур худалдаанаас ашиглах шаардлагагүй" гэв. 

Түрээсийн сурах бичгийг сурагчид багцаар нь авч хэрэглэх бөгөөд дунджаар 20 орчим мянган төгрөг байхаар тооцоолсон байна.

Сурах бичгийн цахим хувилбарыг эндээс үзнэ үү.