Өнөөдөр Японы шинэ эзэн хаан Нарухитогийн “Рэйва” эриний он тоолол эхэлж байна.

“Рэйва” гэдэг нь дэг журам, энх тайван гэсэн хоёр үсгийн нийлэл бөгөөд энэ оны тавдугаар сарын 1-н буюу өнөөдрөөс албан ёсоор хаан ширээнд Нарухито сууснаар эхэлж  байна.

Японы өнөөгийн эзэн хаан, 85 настай Акихито дөрөвдүгээр сарын 30-ны өдөр хаан ширээнээсээ буух ёслол, зан үйл болсон юм.

Хаан Акихито шинто шашны сүмд зочилж, хаан сэнтийгээс буух болсноо бурхдад уламжилж цуврал зан үйлүүдийг хийснээр өчигдөр орон нутгийн цагаар 17:00 цагт эзэн хаан хувиар ард түмэндээ хандаж сүүлчийн удаа үг хэлсэн юм. Акихитогийн хаанчлалын хугацаа шөнө дунд өндөрлөж, өнөөдөр шинэ эзэн хаан, Акихитогийн том хүү, угсаа залгамжилсан хунтайж Нарухито хаан ширээнд суулаа.

Япон соёлд дөрөвдүгээр сар бүх юмны эхлэл байдаг бөгөөд сакура дэлгэрч хичээлийн болон ажлын шинэ жил эхэлдэг гэж үздэг тул энэ сарын 1-нд буюу өнөөдөр ийнхүү шинэ тооллынхоо нэрийг албан ёсоор мөрдөж эхэллээ.

Өнгөрсөн хууль ёсны тооллын нэр нь Хэйсэй буюу энх тайван болох гэсэн утгатай юм. Хэйсэй тоолол нь 1989 онд эхэлж эдүгээ 30 жил үргэлжлээд тавдугаар сарын 1-нд албан ёсоор дуусаж байна. 

Эзэн хаан Акихито нь амьд ахуйдаа хаан ширээгээ залгамжлуулж байгаа анхны тохиолдол болж байгаа аж. Японы тооллын нэрийг япон хэл, түүх, улс төр судлалын эрдэмтэд тогтоодог бөгөөд яагаад Рэйва гэж өгсөн нь тун сонирхол татаж байна. Учир нь, тооллын нэр нь Япон улсын зорилгыг товчоор агуулсан байдаг. Жишээлбэл 1868 оноос өмнө Япон хаалттай улс байсан бөгөөд гадаад далайд иргэдээ гаргадаггүй, гадаад иргэд ч оруулдаггүй байсан үед шинэ тоололд шилжиж хаалттай улс байхаа больж гэрэл гэгээтэй болгож улсаа засъя гэсэн утгаар Мэйжи гэж өгч байсан. Дайны дараагийн тооллоо энх тайван болох буюу одоогийн Хэйсэй гэж өгч байсан байна.

Өнөөдөр зарласан Рэйва тооллын утга нь дэг журмаар энх тайвныг олох гэсэн утгатай байгаа нь Японы цаашдын зорилго нь дэг журамтай байх явдал гэж ойлгож болохоор байна.

Өнөөдөр шинэ хааны сэнтийд залрах ёслолууд болж байна. Ёслолын үеэр Нарухито үеэс үед уламжлагдаж ирсэн эзэн хааны илд, эрдэнэс, тамгыг хүлээн авах юм.

Нарухитогийн хаан сэнтийд залрах томоохон ёслол аравдугаар сарын 22-нд болохоор товлогдсон байгаа ба дөрвөн өдөр үргэлжлэх энэхүү арга хэмжээнд дэлхийн 195 орны удирдагчид уригдаад байгаа аж.

Японы хаадын үе залгамжлал дэлхийд хамгийн урт үргэлжилсэнд тооцогддог бөгөөд нийтийн тооллын тавдугаар зуунаас эхэлсэн Японы хаант засаглалын түүхэнд 126 дахь эзэн хаан Нарухито болж байгаа юм.