"SpaceX" компанийн хувьцааг хөрөнгийн биржид гаргах (IPO) төлөвлөгөө амжилттай хэрэгжвэл тус компанийг үүсгэн байгуулагч Илон Маск дэлхийн түүхэн дэх анхны 1 их наяд ам.долларын хөрөнгөтэй хүн болно.

Хэд хэдэн хэвлэлүүдэд мэдээлснээр, SpaceX компани олон сар хүлээлгэсэн IPO-гийн үнээ зургаадугаар сарын сүүлчээр тогтоохоор төлөвлөж байгаа бөгөөд компанийн үнэлгээг 1.75 их наяд ам.доллар, нэгж хувьцааны үнийг 135 ам.доллар байхаар тооцжээ. Ингэснээр И.Маск дэлхийн анхны их наядтан болж магадгүй байна. "Forbes" сэтгүүлийн тооцоолсноор, түүний хөрөнгө 825 тэрбум ам.доллароос (зургаадугаар сарын 3-ны Зүүн эргийн цагаар 14:00 цагийн байдлаар) 1 их наяд ам.долларт хүрч өсөх боломжтой аж.

Өнгөрсөн сард өгсөн IPO гаргах хүсэлтэээс үзвэл, И.Маск "SpaceX"-ийн 4.8 тэрбум ширхэг хувьцаа (энгийн хувьцааны 42 хувь) эзэмшиж байгаа ажээ. Үүнээс гадна 350 сая ширхэг хувьцааг нэгж бүрийг нь 8.39 ам.доллароор худалдан авах опцион эрх эзэмшдэг байна. Хэрэв "SpaceX"-ийн IPO-г гаргахдаа нэгж хувьцааны үнийг 135 ам.доллар байхаар тогтоовол И.Маскийн тус компанид эзэмшдэг хувьцаа болон опционы нийт үнэлгээ 688 тэрбум ам.долларт хүрнэ. Одоогийн байдлаар "Forbes" сэтгүүл түүний эзэмшиж буй хувийг ойролцоогоор 500 тэрбум ам.доллар гэж үнэлж байгаа ажээ.

"SpaceX"-ийн хувьцаанаас гадна И.Маск "Tesla" компанийн бараг 12 хувийг (174 тэрбум ам.долларын үнэ бүхий), мөн опцион эрх (121 тэрбум ам.долларын үнэ бүхий) эзэмшдэг. Тэрбээр мөн "тархи-компьютерын интерфэйс" хөгжүүлэгч "Neuralink", туннель баригч "Boring Company" компаниудын хувьцааг эзэмшдэг байна.

Өдгөө 54 настай И.Маскийн хувьд их наядтан болох нь түүний намтарт бас нэгэн чухал хуудас болох юм. Тэрбээр ердөө найман сарын өмнө буюу өнгөрсөн оны аравдугаар сард 500 тэрбум ам.доллароос давсан хөрөнгөтэй түүхэн дэх анхны хүнээр тодорсон. Түүнээс өмнө 400 тэрбум ам.долларын хөрөнгийн босгыг "Oracle" компанийг хамтран үүсгэн байгуулагч Ларри Эллисон давж байв. Өнөөдрийн байдлаар И.Маск дэлхийн хоёр дахь хамгийн баян хүн болох Ларри Пэйжээс бараг гурав дахин их хөрөнгөтэй байгаа бөгөөд Л.Пэйжийн хөрөнгө 295 тэрбум ам.доллар, Л.Эллисоны хөрөнгө 283 тэрбум ам.доллараар үнэлэгдэж байна.

Эх сурвалж: Forbes