Албанийн Ерөнхий сайд Эди Рамаг огцрохыг шаардсан эсэргүүцлийн жагсаал зургаа дахь өдрөө үргэлжилж, ням гаригт дахин ширүүсчээ. Тус улсын Засгийн газрын тэргүүн ард иргэдэд хандан нэг цаг гаруй үргэлжилсэн мэдэгдэл хийж, албан тушаалаасаа огцрохгүй гэдгээ мэдэгдсэн байна. Харин ОХУ-ын эрх баригчид жагсаалд оролцогчдод нөлөөлөхийг оролдож байна гэх хэвлэлүүдийн мэдээллийг няцаажээ.

Ням гаригт цагдаа нар жагсагчдын эсрэг ус шүршигч, нулимс асгаруулагч хий хэрэглэсэн байна. Тирана хот дахь Албанийн Боловсролын яамны байрны өмнөх талбай эсэргүүцлийн жагсаал өрнөсөн гол газруудын нэг болжээ. Цагдаа нар тэнд цугласан олныг тараасны дараа жагсагчид нийслэлийн төв хэсэг рүү таран жагсаалаа үргэлжүүлж, олон цаг үргэлжилсэн ширүүн мөргөлдөөн гарсан талаар “AFP” агентлаг мэдээлсэн байна. 

Жагсагчид чулуу, шатамхай шингэн бүхий лонх, пиротехникийн хэрэгсэл шидэж, хогийн савнуудыг галдан шатааснаас гадна, эрх баригч намын төв байрны цонхыг хагалж, цагдаагийн хэсэг болон Дотоод хэргийн яамны байрны үүдийг шатаажээ. 

Ням гаригт болсон жагсаалын үеэр 28 хүн гэмтэж бэртсэний 19 нь цагдаагийн алба хаагч байжээ. Өнгөрсөн долоо хоногт болсон жагсаалын үеэр 272 хүн гэмтэж бэртсэний 169 нь цагдаагийн алба хаагч байсан гэж “AFP” агентлаг мэдээлсэн байна.

Ням гаригт Албанийн Ерөнхий сайд Э.Рама эсэргүүцлийн жагсаал эхэлснээс хойш анх удаа ард түмэндээ хандан дэлгэрэнгүй мэдэгдэл хийжээ. “Facebook” нийгмийн сүлжээний хуудсаараа шууд дамжуулсан түүний мэдэгдлийг хоёр сая орчим хүн үзсэн байна. Албани нь 2.4 сая орчим хүн амтай.

Нэг цаг 14 минут үргэлжилсэн мэдэгдэлдээ Э.Рама огцрохгүй гэдгээ мэдэгдэж, эсэргүүцлийн жагсаалын цаана “гадаадын хүчнүүд” байгаа гэж үзэж байгаагаа илэрхийлжээ. Тэрбээр Иран, ОХУ-ыг дурдсан байна. Түүний хэлснээр, жагсаалын тэргүүн эгнээнд байгаа оюутнуудыг тэдэнтэй ямар ч холбоогүй, эмх замбараагүй байдал үүсгэхийг зорьж буй 200-300 орчим баг зүүсэн хүн “барьцаалсан” гэжээ.

Албанийн эрх баригчид үүссэн нөхцөл байдалтай холбогдуулан аравдугаар сарын 19-нд Австрид хийхээр төлөвлөсөн Э.Рамагийн айлчлал болон тус улсын Канцлер Кристиан Штокертой хийх хэлэлцээг цуцалсан байна. 

Тус улсад эсэргүүцлийн жагсаал аравдугаар сарын 13-нд нийслэл Тирана хотод эхэлжээ. Жагсагчид их, дээд сургуулиудын төлбөр өндөр, авлига газар авсан зэрэг асуудлыг шийдвэрлэхийг эрх баригчдаас шаарджээ.

ОХУ-ын эрх баригчдын улс төрийн үзэл санааг тодорхойлогчдын нэг гэгддэг Александр Дугин Албанийн жагсагчдыг дэмжиж буйгаа бямба гаригт илэрхийлжээ. Энэхүү эсэргүүцлийн ажиллагаа нь албаничууд “сэрж эхэлж” байгааг уг харуулж байна гэж тэрбээр мэдэгдсэн байна. 

ОХУ-аас Тирана хотод суугаа Элчин сайдын яам жагсаалын талаар шууд тайлбар хийгээгүй ч Оросын иргэдэд сонор сэрэмжтэй байж, олон хүн цугларсан газраар явахгүй байхыг зөвлөжээ.

18-ны ням гаригт ОХУ-ын Гадаад хэргийн яамны албан ёсны төлөөлөгч Мария Захарова Орос, Ираныг Албанийн эсэргүүцлийн жагсаалд хөндлөнгөөс оролцсон гэж буруутгасанд тайлбар хийхдээ “Үгүй дээ, Эди Рама. Танай улсын иргэд өөрсдөө эсэргүүцлийн жагсаал хийж байна. Хариуцлагаа бусдад бүү тох. Дотоод асуудлаа өөрсдөө шийдвэрлэ” гэж мэдэгджээ.

AFP