Отгонтэнгэр уулын тэнгэрийг тахих төрийн их тахилга удахгүй болохтой холбогдуулан Завхан аймгийн Засаг даргын Тамгын газар, Төрийн тахилгыг зохион байгуулах комиссоос тахилгын ёслолд оролцох иргэд, мөргөлчид, жуулчдад зориулсан есөн заалт бүхий санамжийг цахим хэлбэрээр түгээхээр бэлтгэж байна.

Таван жил тутамд нэг удаа зохион байгуулдаг Отгонтэнгэр уулын төрийн их тахилга нь Монголын төрт ёс, шашин, соёлын чухал уламжлалт үйл ажиллагааны нэг бөгөөд уг ёслолыг үзэж сонирхохоор гадаад, дотоодын олон жуулчин, сүсэгтэн олон Завхан аймагт хүрэлцэн ирдэг юм.

Энэ удаагийн төрийн тахилгын үеэр байгаль орчныг хамгаалах, уламжлалт ёс заншлыг дээдлэх, иргэдийн аюулгүй байдлыг хангах зорилгоор дараах санамжийг мөрдөхийг зохион байгуулагчид уриаллаа.

Үүнд:

• Отгонтэнгэр хайрхан ууланд хадаг, торго, хувцас болон бусад эд зүйл өргөхгүй байх;
• Бадархундага нуурт мөнгөн аяга, бумба өргөхөөс татгалзаж, шүл мөнгө буюу ембүү өргөхийг хориглох;
• Шашин, соёлын үйл ажиллагаанд оролцохдоо архи, тамхи хэрэглэхгүй байх, хэрүүл маргаан үүсгэхгүй байх;
• Олон салаа зам гаргахгүйгээр нэг чиглэлийн замаар зорчиж, автомашинаа зөвшөөрөгдсөн талбайд байрлуулан хөдөлгөөний аюулгүй байдлыг хангах;
• Хог хаягдлаа ил задгай хаяхгүй, зориулалтын уутанд хийж тогтоосон цэгт хүргэх;
• Галын аюулгүй байдлыг чанд сахиж, ил задгай гал түлэхгүй байх;
• Тахилгын хөтөлбөр, дэг журам болон Монголын уламжлалт ёс заншлыг хүндэтгэн мөрдөх;
• Ахмад настан, хүүхэд болон тусгай хэрэгцээт иргэдэд хүндэтгэлтэй хандаж, аюулгүй байдлыг ханган хараа хяналтаа сайжруулах;
• Бадархундага нуур болон тахилгын овооноос дээш зөвхөн эрэгтэйчүүд гардаг уламжлалыг хүндэтгэн мөрдөх зэрэг багтаж байна.

"Эх дэлхий, уул усaa хайрлан хамгаалж, төрийн тахилгын ёслолд хүндэтгэлтэй, соёлтой оролцохыг нийт иргэд, зочид төлөөлөгчдөөс хүсье" хэмээн Төрийн тахилгыг зохион байгуулах комиссын дарга Д.Уужимсанаа мэдээллээ.

Отгонтэнгэр хайрхан нь Монгол Улсын төрийн тахилгат уулсын нэг бөгөөд төрийн их тахилгын ёслол нь байгаль дэлхийгээ дээдлэн шүтэх монголчуудын уламжлалт зан үйл, төрт ёсны өв соёлыг хадгалан түгээн дэлгэрүүлэхэд чухал ач холбогдолтой үйл ажиллагаа юм.