Филиппин Улсын Минданао арлын орчимд энэ сарын 8-нд 7.8 магнитудын газар хөдлөлт болж, үүний улмаас Филиппин болон Индонезийн зарим бүс нутагт цунамигийн сэрэмжлүүлэг зарласан байна.
Иймд дээрх хоёр улсаар зорчиж буй болон оршин суугаа манай улсын иргэд тухайн улсын эрх бүхий байгууллагаас гаргаж буй мэдээлэл, сэрэмжлүүлэг, аюулгүй ажиллагааны заавар зөвлөмжийг тогтмол авч, чанд мөрдөхийг зөвлөж байна. Түүнчлэн далайн боомт болон нам дор бүсэд байгаа иргэд эргээс хол байх, цунамигийн эрсдэлтэй бүсэд очихоос зайлсхийх, аюулгүй байдлаа сайтар хангах нь зүй юм.
Мөн газар хөдлөлтийн дараах чичирхийлэл үргэлжлэх магадлалтай тул эвдэрч гэмтсэн барилга байгууламжид нэвтрэхгүй байх, онцын шаардлагагүй тохиолдолд эрсдэлтэй бүсэд зорчихгүй байх, холбооны хэрэгслээ ашиглах боломжтой байлгаж, гэр бүл, ойр дотны хүмүүстэйгээ тогтмол холбоотой байх хэрэгтэй.
Онцгой нөхцөл байдал үүссэн тохиолдолд орон нутгийн онцгой байдлын байгууллагын зааврыг дагаж мөрдөж, шаардлагатай бол Монгол Улсаас Бүгд Найрамдах Индонез Улсад суугаа Элчин сайдын яамтай холбоо барихыг зөвлөж байна. Яаралтай үед холбоо барих дугаар +62 81188030122 гэж Монгол Улсаас Бүгд Найрамдах Индонез Улсад суугаа ЭСЯ-наас мэдээллээ.
