Монгол Улсад орчны бохирдол, хүний эрүүл мэндэд нөлөөлөх аюултай химийн бодисуудын илрүүлэлтийг өндөр түвшинд хийх, шинжилгээний нэгдсэн тогтолцоог бий болгох зорилгоор байгаль орчны лабораториудыг нэгтгэж, бүсчилсэн төвүүдийг байгуулан өргөжүүлэх шийдвэр гарлаа.

Уг ажлын хүрээнд хүний эрүүл мэндэд хортой, хавдрын шалтгаан болох хүнд металл, органик хорт нэгдлүүдийг ус, хөрс, агаар дахь агууламжаар нь нарийвчлалтай тогтоох чадавхтай лабораториудыг шинээр бүрдүүлж, орчны бохирдлоос урьдчилан сэргийлэх, хяналт тавих үндэсний тогтолцоог бэхжүүлэхийг зорьж байна.

Энэ хүрээнд дараах лабораториудыг нэгтгэхээр болжээ:

• Усны газрын Усны лаборатори

• Байгаль орчны судалгаа шинжилгээний төвийн лаборатори

• Ус цаг уур, орчны судалгаа мэдээллийн хүрээлэнгийн Усны биологийн лаборатори

• Цэнгэг усны нөөц, байгаль хамгаалах төвийн лаборатори

Дээрх байгууллагуудыг нэгтгэн Цаг уур, орчны шинжилгээний газрын харьяа Байгаль орчин, хэмжил зүйн төв лаборатори болгон нэгтгэх бөгөөд энэ нь орчны шинжилгээний нэгдсэн удирдлага, төрийн үйлчилгээний хүртээмжийг нэмэгдүүлэх суурь болох юм.

Мөн бүсчилсэн хөгжлийн бодлоготой уялдуулан дараах таван аймагт бүсийн төв лаборатори байгуулах шийдвэр гарчээ:

• Говийн бүсийн төв лаборатори – Өмнөговь аймаг

• Баруун бүсийн төв лаборатори – Увс аймаг

• Хангайн бүсийн төв лаборатори – Өвөрхангай аймаг

• Төвийн бүсийн төв лаборатори – Дархан-Уул аймаг

• Зүүн бүсийн төв лаборатори – Хэнтий аймаг

Ийнхүү байгаль орчны шинжилгээний чадавхыг төвлөрүүлэн сайжруулах нь хүрээлэн буй орчны доройтлыг бууруулах, шинжилгээний үр дүнг үндэсний хэмжээнд ашиглах боломжийг нэмэгдүүлж, аюултай бохирдлыг эрт илрүүлэх, хариу арга хэмжээ авах чадавхыг эрс сайжруулах юм.

Эх сурвалж: Байгаль орчин, аялал жуулчлалын яам.