Монголын сагсан бөмбөгийн үндэсний дээд лигийн 2024-2025 оны улирлын аварга тун удахгүй тодрох гэж байна. Финалын шатанд “Хасын Хүлэгүүд”, “Бишрэлт Металл” багууд шалгарч үлдээд буй бөгөөд одоогоор “Хасын Хүлэгүүд” 3:2-оор тэргүүлж, цом өргөхөд ганцхан ялалт үлдээд байна. Тэд тав дахь тоглолтод өрсөлдөгчөө 84:48 онооны харьцаатай буулган авсан юм.

Энэ жилийн аварга баг 2025-2026 оны улиралд Зүүн Азийн супер лигт Монгол Улсаа төлөөлөн оролцох эрхтэй. Энэхүү батламжийг тус лигийн гүйцэтгэх захирал Хенри Керинс Монголын сагсан бөмбөгийн холбооны ерөнхийлөгч Г.Батцэнгэлд албан ёсоор гардуулжээ.

Шинэ улиралд Зүүн Азийн супер лигт 12 баг оролцох бөгөөд тэднийг дөрөв дөрвөөр хувааж, гурван хэсэгт өрсөлдүүлэх юм. Монголын аварга “B” хэсэгт багтах ба Япон, БНСУ, Филиппиний аваргуудтай нэг хэсэгт оноолт таарчээ. Багууд хэсгийн шатанд зургаан тоглолт хийх бөгөөд гурав нь Монголд, гурав нь зочин талбайд болох юм.

Лигийн тоглолтууд ирэх есдүгээр сарын 27-нд эхлэх бол Монголын төлөөлөгч баг аравдугаар сарын 7-нд Филиппиний дэд аваргын талбайд анхны тоглолтоо хийхээр хуваарьлагджээ. Харин арваннэгдүгээр сарын 5-нд БНСУ-ын лигийн аваргыг Улаанбаатарт хүлээн авах юм.

Зүүн Азийн супер лигийн 2024-2025 оны улирлын тоглолтыг 192 сая хүн үзсэн гэх үзүүлэлт байгаа нь энэ тэмцээний нэр хүнд, цар хүрээг илтгэж байна.

Эх сурвалж: Монголын сагсан бөмбөгийн холбоо