Халдварт өвчин судлалын үндэсний төв (ХӨСҮТ)-өөс өгсөн мэдээллээр, 2025 оны тавдугаар сарын 14-ний өдрийн байдлаар улаанбурхан өвчний батлагдсан тохиолдол 1789-д хүрчээ. Одоогоор 301 хүн эмнэлэгт хэвтэн эмчлүүлж, 233 хүн гэрийн хяналтад, 1255 хүн эдгэрсэн байна. Мөн 33237 хүн халдвартай ойр байсан буюу хавьталд бүртгэгдсэн бөгөөд нэг хүн нас барсан харамсалтай тохиолдол гарчээ.

Халдвар Ерөнхий боловсролын сургуулиудад голомтлон бүртгэгдэж байгаа нь хүүхдүүдийн дунд хурдацтай тархах эрсдэлийг өндөр байгааг харуулж байна. Улаанбурхан нь агаар дуслаар хялбархан халдварладаг бөгөөд халдварлах чадвар маш өндөр тул урьдчилан сэргийлэх хамгийн үр дүнтэй арга нь вакцинжуулалт юм.

Эрүүл мэндийн байгууллагууд иргэдийг өөрийгөө болон ойр дотнын хүмүүсээ хамгаалахын тулд улаанбурханы эсрэг вакцинд идэвхтэй хамрагдахыг уриалж байна. Ялангуяа бага насны хүүхдүүд болон сургуулийн орчинд ажиллаж буй багш ажилчид вакциндаа хамрагдах нь онцгой ач холбогдолтойг санууллаа.

Эх сурвалж: ХӨСҮТ