Нийслэл хотод шугам сүлжээний шинэчлэл, зам засварын ажлуудтай холбоотойгоор энэ долоо хоногт гурван байршилд авто замын хөдөлгөөнийг хэсэгчлэн хязгаарлахаар боллоо.

Тодруулбал, Баянгол дүүргийн XX хороо, Цагдан хорих 461 дүгээр ангийн баруун хойд талын туслах замыг өнөөдрөөс эхлэн 20 хоногийн хугацаатай бүрэн хааж байна. Энэ нь ДЦС-3, 4-р цахилгаан станц руу ус дамжуулах шугам хоолой татах барилга угсралтын ажлын хүрээнд хийгдэж буй бөгөөд түр замаар хоёр чиглэлийн хөдөлгөөнийг зохион байгуулахаар болжээ.

Энхтайваны өргөн чөлөөний авто замд ч засварын ажил хийгдэхээр төлөвлөгдсөн. Маргааш буюу 21-ний 22:00 цагаас “Гранд плаза”-гаас XI сургуулийн уулзвар хүртэлх замын урд талын эгнээ 24 цагийн хугацаанд бүрэн хаагдах бол хойд талын эгнээ 22-ны 22:00 цагаас 24-ний 06:00 цаг хүртэл хэсэгчлэн хаагдаж, асфальтбетон хучилтын ажил явагдана.

Мөн Шадивлан зуслангаас Дамбадаржаа хүртэлх авто замын шинэчлэлийн ажлын хүрээнд “Дөт” хүнсний дэлгүүрээс 58 дугаар бага сургууль хүртэлх хоёр км замыг маргаашийн 01:00 цагаас эхлэн түр хугацаанд хааж, зорчих хэсгийн суурийн бүтээцийг хүчитгэх, асфальтбетон хучилт хийх аж. Уг замыг энэ сарын 27-ны 06:00 цагт нээхээр төлөвлөсөн байна.

Эх сурвалж: Нийслэлийн Замын хөгжлийн газар