Финланд улс Европын Холбооны хүрээнд Украинд цэргийн тусламж үзүүлэх санаачилгын нэг хэсэг болон, Оросын царцаасан хөрөнгөөс олсон орлогыг ашиглан сум, зэвсэг нийлүүлэхээр болжээ. Тус улсын Батлан хамгаалах яамнаас мэдээлснээр, Европын энх тайвны сан (EPF)-гийн хүрээнд хэрэгжих энэхүү ажиллагаанд зориулан Европын Комисстой 90 сая еврогийн гэрээ байгуулсан байна.

Финландын батлан хамгаалахын сайд Антти Хяккянен “Украины Зэвсэгт хүчинд нийлүүлэх зэвсгийг дотоодын үйлдвэрлэгчдээс худалдан авах нь Финландын аж үйлдвэрийн салбарт эерэг нөлөө үзүүлж, ажлын байр нэмэгдүүлэх давуу талтай” гэж мэдэгджээ. Тэрбээр мөн Украин улсыг дэмжих 660 сая еврогийн хөтөлбөрийг хэрэгжүүлж буйгаа дурдсан байна.

Финланд улс цаашид Украин болон НАТО-д зориулсан дрон үйлдвэрлэлийг эхлүүлэхээр төлөвлөж байгаа бөгөөд “Summa Defence” компанийн мэдээлснээр, богино хугацаанд дотооддоо нисгэгчгүй төхөөрөмжийн шинэ үйлдвэр байгуулан, үйлдвэрлэлийн хүчин чадлаа нэмэгдүүлэх зорилт тавьжээ.

Эх сурвалж: DW