“Олон нийтийн оролцоотойгоор ахмад настны урт хугацааны тусламж үйлчилгээний систем”-ийг бэхжүүлэх зорилготой төслийг Азийн хөгжлийн банкны дэмжлэгтэйгээр амжилттай хэрэгжүүллээ. Тус төсөл Дархан-Уул аймгийн Ахмадын хөгжлийн төв, Сэлэнгэ аймгийн Мандал сумын Нэгдсэн эмнэлэг болон нийслэлийн Сонгинохайрхан дүүргийн “Ачлалт хүүхдүүд” ТББ дээр туршилтаар хэрэгжсэн байна.

Төсөлд нийт 14 мянга гаруй ахмад оролцсоноос 3700 орчимд эрсдэлийн үнэлгээ хийж, 400 гаруй ахмадад 4-6 жилийн хугацаанд үргэлжлэх кейс менежмент буюу эрүүл мэнд, нийгмийн хамгааллын цогц тусламж, үйлчилгээ үзүүлсэн байна. Энэхүү үйлчилгээ нь ахмадуудын эрүүл мэндийн байдал, асаргааны хэрэгцээ, нийгмийн оролцоог хамтад нь үнэлж, хувь хүний онцлогт нийцүүлэн тусламж үзүүлэх загварт суурилжээ.

Туршилтаар нэг загварын үйлчилгээг гурван өөр газар хэрэгжүүлж, харьцуулсан үнэлгээ хийснээр ирээдүйд нийтийг хамарсан систем бүрдүүлэхэд шаардлагатай бодит суурь мэдээлэл бүрдүүлжээ. Монгол Улсын Ахмад настны тухай хуульд асаргааны хувилбарт үйлчилгээг нэвтрүүлэхээр тусгасан бөгөөд энэ удаагийн төсөл үүний бэлтгэл ажлын нэг болсон юм.

Олон улсад, тухайлбал Япон улсад ийм төрлийн үйлчилгээ амжилттай хэрэгжиж байгаа жишээ бий. Асаргааны даатгалын санхүүжилтээр ахмад настанд гэрээр нь очиж сэргээн засах үйлчилгээ, ахуйн тусламж үзүүлдэг байгууллагууд үйл ажиллагаа явуулдаг. Үйлчилгээний зардлын тодорхой хувийг эрүүл мэнд болон асаргааны даатгалын сан хариуцаж, иргэнээс 0-30 хувийн төлбөрийг хураадаг тогтолцоо үйлчилдэг байна.

Монголд хэрэгжүүлсэн энэхүү төсөл цаашид ахмадын асаргаа, хамгааллын шинэ тогтолцоог үндэслэн бүрдүүлэх суурь алхам болно гэж үзэж байна.

Эх сурвалж: Хөдөлмөр, нийгмийн хамгааллын яам