Дархан-Уул аймгийн Буддын шашны сүм, хийдүүдийн холбооноос санаачлан “Буянт хайрхны цэцэрлэгт хүрээлэн” нэртэй ногоон төгөл байгуулахаар 31 дүгээр хорооллын арын толгойд ажлаа эхлүүлжээ. Аймгийн зүгээс 6 га газрыг шийдвэрлэж өгсөн бөгөөд нийт 10 мянган мод тарих зорилготой төслийн хүрээнд өнөөдрийн байдлаар 900 орчим мод аль хэдийнэ таригдсан байна.

Цэцэрлэгт хүрээлэнд гацуур, буйлс, давхар дэлбээт буйлс, хүрэн монос, паркийн сарнай зэрэг ногоон ургамал тарьж, төв хэсэгт нь Ногоон Дарь эхийн хөшөө босгох бөгөөд байгаль, шашин, өв уламжлал, орчин үеийн шийдлийг хослуулсан тохижилт хийхээр төлөвлөжээ.

Төслийг сүсэгтэн олон, аж ахуйн нэгж байгууллагуудын дэмжлэг, хандив болон орон нутгийн хамтын ажиллагаатайгаар хэрэгжүүлж байгаа бөгөөд “Тэрбум мод” үндэсний хөдөлгөөн, “Ногоон Дархан–2032” хөтөлбөрийн зорилгод бодит хувь нэмэр оруулахыг зорьж байна.

Уг төгөл нь иргэдийн амралт, чөлөөт цагийг өнгөрүүлэхэд зориулсан тохь тухтай, сэтгэлийн амар амгаланг мэдрүүлэх орчин болж, ирээдүйд Дарханы онцлох ногоон байгууламжийн нэг болохоор төлөвлөгдөж байна.