Ерөнхий сайд, эрх баригч МАН-ын дарга асан Л.Оюун-Эрдэнийн телевизэд өгсөн бүтэн зургаан цагийн ярилцлагыг үзсэн иргэдийн дүгнэлтүүд цахим хуудсыг дүүргэж байна. Олон нийтийн илэрхийлж байгаа дүгнэлт, сэтгэгдлүүдийг харахад Л.Оюун-Эрдэнийг зөв, сайн ярилаа гэхээс илүүтэйгээр доромжилсон, шүүмжилсэн, харлуулсан, хэлсэн үг, байгаа байдлыг нь инээд наргиан болгож маазрах нь их юм. Матарлах нь ч байх шиг. Харин учир мэдэх хүмүүс түүний ярианд авч гээхийн ухаанаар хандан айхтар сүрхий яриа боллоо, ард түмэнд сайн мессэж өглөө гэж байна.
Юуны өмнө өнгөрсөн болоод одоо болж буй улс төрийн өрнөлд есөн сар дуугараагүй, байр сууриа илэрхийлээгүй явсан “итгэл даагаагүй” Ерөнхий сайдын хэлэх үг ямар байх бол гэсэн иргэдийн хүлээлтэд цэг тавьсан ярилцлага боллоо. Тэгэхээр уг ярилцлагаас ямар дүгнэлт хийж болох вэ. Хамгийн гол пойнт нь сүүлийн 10 гаруй жил төрийн эрхийг дангаараа барьсан Ардын нам дотооддоо айхавтар гүн гүнзгий хагаралтай байгааг олон нийт мэдэж авлаа. 60 тэрбумаас эхэлсэн Ардын намын хагарал 40 их наядын нүүрсний хулгайгаар улам гүнзгийрч гэдгийг мэдлээ. Энэ олон хулгай, луйвраасаа салах Ардын намынхны ганц гарц боломж нь тэд эвлэлдэн нэгдэх юм. Гэхдээ намын дарга асан Л.Оюун-Эрдэнийн хэлж байгаагаар Ардын намынхан нэгдэхээсээ нэгэнт өнгөрсөн бололтой. Энэ бол ард түмний хувьд сайн мэдээ гэж хүлээж авах нь тун зөв.
Нөгөөтэйгүүр МАН доторх хуваагдсан фракц эвлэрээд хулгайгаа нууя гэж оролдвол тэдний дунд “яс хаях”, хулгайг нь сануулах улстөрчид ч цөөнгүй байна. Тухайлбал, Л.Оюун-Эрдэнийн фракцын 20 орчим гишүүн парламентад бий. Гадна талд сөрөг хүчний 42 гишүүн мөн парламентад суудалтай бусад жижиг намуудын төлөөлөл ч байна. Ингээд бодоход энэ парламентын үед лав Ардын нам хаашаа ч хөдөлж чадахааргүй болжээ. Энэ ард түмэнд хүрч байгаа бас нэг сайн мэдээ юм. Өөрөөр хэлбэл, Ардын намынхны хагарал гүнзгийрэх тусам л ард түмэнд ашигтай байна гэсэн үг.
Хэрэв эд нар эвлэлдээд, нэгдээд ирвэл цаагуураа ямар том хулгай хийдгийг Монголын ард түмэн мэдэж байгаа. Тиймээс хулгай луйвар, аливаа улс төрийн зодоон бүхэн нь л олон нийтийн нүдэнд ил байж яг одоогийнх шиг хэрэлдэж, алалцаж л байвал ард түмэнд ашигтай байх юм. Хамгийн гол айдас энэ нам дарангуйлал тогтоох вий гэсэн хардлага байв. Одоо бол тэр талаар бодолтгүй болжээ. Үүнийг ч Оюук хэлэх шиг боллоо. Ардын нам эвлэрч, нягтарсан цаг үед ард түмэн айх айдастайгаар дарангуйлал руу орж явсан. Нэг хэсэг Н.Энхбаяраа Монголын хаан гэж яригддаг болтлоо Ардын намын нягтрал хүчээ авч байсан цаг саяхан. Тэр үед эрх мэдэлтнүүдээ бурхан багш шиг санаж мөргөж, мөлхөж орж үг сургаалыг нь сонсдог байсан гэдэг нь худлаа биш...
Э.Мөнхтүвшин, Өдрийн сонин
