Сүүлийн жилүүдэд төрийн тусгай чиг үүрэг хэрэгжүүлдэг байгууллагын албан хаагчид үүрэг гүйцэтгэх явцдаа гэмт халдлага, үйлдвэрлэлийн осол, хурц хордлого, амь насаа алдах зэрэг эрсдэлд өртөх тохиолдол цөөнгүй бүртгэгдсээр байна. Үүний улмаас хөдөлмөрийн аюулгүй байдал, эрүүл ахуйн тогтолцоог боловсронгуй болгох зайлшгүй шаардлага тулгарч буйг Гэр бүл, хөдөлмөр, нийгмийн хамгааллын яамнаас онцолжээ.

2024 онд тус яамнаас төрийн тусгай чиг үүрэг хэрэгжүүлэгч байгууллагуудад хөдөлмөрийн аюулгүй байдал, эрүүл ахуйн хууль тогтоомжийг мөрдүүлэх, ажилтнуудын амь нас, эрүүл мэндийг хамгаалах чиглэл бүхий албан даалгаврыг хүргүүлсэн байна. Үүний дагуу Онцгой байдлын ерөнхий газрын харьяа нийт 152 нэгж байгууллагад улсын үзлэгийг 2025 оны хоёрдугаар сард зохион байгуулжээ.

Үзлэгийн дүнгийн талаар 2025 оны тавдугаар сарын 19-нд болсон хуралдаанаар танилцуулсан бөгөөд хөдөлмөрийн аюулгүй байдал, эрүүл ахуйн талаарх хууль, дүрэм журмын хэрэгжилт, ажлын байрны эрсдэлийн үнэлгээ, осол, гэмтлээс урьдчилан сэргийлэх зохион байгуулалт, сургалт зааварчилгааны хэрэгжилт зэрэгт үнэлгээ хийжээ.

Хурлын үр дүнд болзошгүй осол, хурц хордлого, мэргэжлээс шалтгаалсан өвчлөлөөс урьдчилан сэргийлэх чиглэлээр салбарын улсын ерөнхий байцаагчийн зөвлөмжийг Онцгой байдлын ерөнхий газарт хүргүүлэхээр болсон байна.

Ийнхүү төрийн тусгай үүрэгтэй байгууллагын албан хаагчдын эрүүл, аюулгүй орчинд ажиллах нөхцөлийг сайжруулахад чиглэсэн бодитой алхмууд хийгдэж эхэллээ.

Эх сурвалж: Гэр бүл, хөдөлмөр, нийгмийн хамгааллын яам