Цаг уурын нөхцөл байдлын тухай ЦУОШГ-ын энэ сарын 10-ны мэдээллээс харахад Баян-Өлгий, Дундговийн ихэнх, мөн Ховд, Говь-Алтай, Завхан, Баянхонгор, Архангай, Өвөрхангай, Төв аймгийн зарим сумын нутагт бэлчээрийн ургамал хангалттай ургаагүй байна. Ийм нөхцөл нь малын тэжээлд нөлөөлөх эрсдэлтэй.

Харин Орхон аймгийн нийт нутаг болон Хэнтий, Дорнодын бүх сум, мөн Дархан-Уул, Хөвсгөл, Булган, Сэлэнгэ, Өмнөговь зэрэг аймгийн олон сумдад ургамал хэвийн ургаж байгаа бол бусад нутгуудад ургамлын өсөлт дунд түвшинд явагдаж байна.

Цаг уурын аюултай үзэгдэл ч олон газар бүртгэгджээ. Тухайлбал, Баянхонгор, Өвөрхангай аймгийн зарим сумдаар салхины хурд 27-34 м/с хүрч, аюултай үзэгдэл хэмжээнд хүрсэн байна. Эдгээр хүчтэй салхи, шуурганы улмаас зам даваа цасанд хаагдаж, тээвэрлэлтийн хүндрэл үүсжээ. Архангайн Цагаан даваа, Завханы Солонготын даваанд авто зам хаагдсан байдалтай байсан бол Хөвсгөл, Булган, Төв, Өвөрхангай зэрэг аймгийн зарим сумдад цас, бороо орж, гулгаа, халтиргаа үүссэн байна.

Агаарын температурын хувьд нийт нутгаар улирлын дунджаар буюу түүнээс хүйтэн байсан бол Баян-Өлгий, Дархан-Уул, Орхон, Хөвсгөл зэрэг зарим аймагт дунджаас дулаан байжээ. Хур тунадасны хэмжээний хувьд нийт нутгийн 60 орчим хувьд дунджийн орчим буюу ахиу байсан бол үлдсэн хэсэгт бага хэмжээтэй орсон байна.

Хөвсгөл, Архангай, Өвөрхангайн зарим сумдад 40-85 мм хүртэл хур тунадас орсон нь тухайн бүсийн зам тээвэр, газар тариалан, бэлчээрийн нөхцөлд тодорхой нөлөө үзүүлж байгаа юм.

Эх сурвалж: ЦУОШГ